සවුදි අරාබියේ පිහිටි ප්රින්ස් සුල්තාන් ගුවන් කඳවුරට (Prince Sultan Air Base) පසුගිය මාර්තු 27 වනදා ඉරානය විසින් එල්ල කළ මිසයිල සහ ඩ්රෝන ප්රහාරයකින් ඇමරිකානු ගුවන් හමුදාවේ අතිශය තීරණාත්මක E-3 Sentry AWACS යානයකට බරපතල හානි සිදුව ඇති බව වාර්තා වේ. මෙම ප්රහාරයෙන් ඇමරිකානු සෙබළුන් 10 දෙනෙකුට අධික පිරිසක් තුවාල ලබා ඇති අතර ඉන් දෙදෙනෙකුගේ තත්ත්වය බරපතල බව ‘Air & Space Forces Magazine’ තහවුරු කරයි. ප්රහාරයෙන් තවත් ඉන්ධන පිරවුම් යානා කිහිපයකට ද හානි සිදුව ඇති අතර විනාශ වූ යානයේ ඡායාරූප මේ වන විට සමාජ මාධ්ය ඔස්සේ සංසරණය වෙමින් පවතී.
මෙම යානය හුදෙක් ප්රහාරක යානයක් නොව එය අහසේ පාවෙන “සන්නිවේදන සහ පාලන මධ්යස්ථානයක්” (Airborne Command and Control Center) ලෙස ක්රියා කරයි. එහි ප්රධානතම සුවිශේෂී ලක්ෂණය වන්නේ යානය මත සවිකර ඇති විශාල භ්රමණය වන රේඩාර් තැටියයි. එමගින් කිලෝමීටර් 400 කට වඩා දුරින් ඇති සතුරු මිසයිල, ඩ්රෝන සහ ගුවන් යානා ඉතා නිවැරදිව හඳුනාගත හැකි අතර එකවර ඉලක්ක සිය ගණනක් නිරීක්ෂණය කරමින් මිත්ර පාර්ශවයේ ප්රහාරක යානා මෙහෙයවීමේ හැකියාව පවතී. ඕනෑම කාලගුණික තත්ත්වයක් යටතේ ක්රියාත්මක විය හැකි මෙම යානය මැදපෙරදිග අහසේ ඇමරිකානු ගුවන් ආරක්ෂණ ජාලයේ ප්රධානතම පුකිකාව ඉටුකරය
ඩොලර් මිලියන 300 කට අධික වටිනාකමකින් යුතු මෙම යානයට හානි වීම ඇමරිකානු ගුවන් හමුදාව ලැබූ විශාල උපායමාර්ගික පසුබෑමකි. විශේෂයෙන්ම ඉරානයෙන් එල්ල වන මිසයිල ප්රහාර කලින් හඳුනාගෙන ඒවා මැඩපැවැත්වීමට ඇති හැකියාව මෙමගින් අඩාල විය හැකිය. මෙම ප්රහාරය ඇමරිකානු – ඊශ්රායල සහ ඉරාන යුද්ධයේ තීරණාත්මක හැරවුම් ලක්ෂ්යයක් ලෙස ආරක්ෂක විචාරකයෝ හඳුන්වති. සවුදි අරාබිය වැනි මිත්ර රටක පිහිටි ආරක්ෂිතම ගුවන් කඳවුරකට මෙලෙස සාර්ථකව ප්රහාර එල්ල කිරීමට ඉරානයට හැකි වීම කලාපීය ආරක්ෂාව පිළිබඳව බරපතල ප්රශ්න මතු කර ඇත.
