ශ්රී ලංකාව තුළ රැඳී සිටිමින් අන්තර්ජාලය ඔස්සේ මූල්ය වංචාවල නිරත වූ චීන ජාතිකයින් 125 දෙනෙකුගෙන් යුත් කණ්ඩායමක් මෙරටින් පිටුවහල් කිරීමට ආගමන විගමන දෙපාර්තමේන්තුව පියවර ගෙන තිබේ. චීන රජය සමඟ පවත්වන ලද දීර්ඝ සාකච්ඡාවලින් අනතුරුව, ඔවුන් රැගෙන යාම සඳහා චීනයෙන් පැමිණි විශේෂ ගුවන් යානයක් මඟින් මෙම පිටුවහල් කිරීමේ ක්රියාවලිය සිදු කර ඇති බව ආගමන විගමන දෙපාර්තමේන්තු ප්රකාශකයෙකු සඳහන් කළේය.
පසුගිය මාර්තු 17 වනදා අනුරාධපුර ප්රදේශයේ නවාතැන්පොළවල් කිහිපයක රැඳී සිටිමින් මෙම මූල්ය වංචා සිදු කරමින් සිටියදී යුද හමුදා බුද්ධි අංශය සහ ආගමන විගමන දෙපාර්තමේන්තුව එක්ව සිදුකළ විශේෂ මෙහෙයුමකදී මොවුන් අත්අඩංගුවට ගෙන තිබුණි. විමර්ශනවලදී අනාවරණය වී ඇත්තේ මොවුන් සංචාරක සහ ව්යාපාරික වීසා මත මෙරටට පැමිණ, වීසා කාලය ඉක්මවා රැඳී සිටිමින් මෙරට ආගමන විගමන නීති උල්ලංඝනය කර ඇති බවයි. අත්අඩංගුවට ගැනීමෙන් පසුව මොවුන් වැලිසර පිහිටි ආගමන විගමන රැඳවුම් මධ්යස්ථානයේ රඳවා තබා තිබුණි.
චීන ආගමන විගමන දෙපාර්තමේන්තු නිලධාරීන් කණ්ඩායමක් සහ වෛද්යවරයෙකු ද ඇතුළත් කණ්ඩායමක් මෙම පිටුවහල් කිරීමේ ක්රියාවලිය අධීක්ෂණය කිරීම සඳහා විශේෂ ගුවන් යානයකින් මෙරටට පැමිණි අතර, ඊයේ (29) රාත්රියේ චීන ජාතිකයින් පිරිස මෙරටින් පිටව ගොස් තිබේ. ශ්රී ලංකා ආගමන විගමන දෙපාර්තමේන්තුවේ හය දෙනෙකුගෙන් යුත් නිලධාරීන් කණ්ඩායමක් ද මෙම පිරිස සමඟ චීනය බලා පිටත්ව ගොස් ඇති බව වාර්තා වේ.
