සෞදි අරාබියේ නැගෙනහිර කලාපය (Eastern Region) ඉලක්ක කරගනිමින් අද (සඳුදා) අලුයම එල්ල වූ ප්රබල බැලිස්ටික් මිසයිල ප්රහාර පහක් සාර්ථකව හඳුනාගෙන විනාශ කිරීමට සෞදි ආරක්ෂක අමාත්යාංශය සමත් වී තිබේ. සෞදි ප්රවෘත්ති ඒජන්සිය (SPA) උපුටා දක්වමින් ආරක්ෂක අමාත්යාංශයේ ප්රකාශක මේජර් ජෙනරාල් තුර්කි අල්-මල්කි (Turki Al-Malki) තහවුරු කළේ, අදාළ කලාපයට එල්ල වීමට තිබූ මෙම මිසයිල තර්ජනයන් ගුවන් ආරක්ෂක පද්ධති මගින් සම්පූර්ණයෙන්ම නිෂ්ක්රීය කළ බවයි. මීට පෙර එම ප්රදේශයටම එල්ල වූ ක්රූස් මිසයිලයක් (Cruise missile) ද විනාශ කිරීමට සෞදි හමුදා සමත් වූ අතර, මේ වන විට ප්රදේශයේ ආරක්ෂාව උපරිම මට්ටමකට තර කර ඇත.
මැදපෙරදිග කලාපයේ ඇමරිකාව, ඉශ්රායලය සහ ඉරානය අතර පවතින උණුසුම් යුදමය වාතාවරණය මධ්යයේ සෞදි අරාබියට එල්ල වන මෙම ප්රහාර මාලාව ලෝක වෙළඳපොළේ ඉන්ධන මිල කෙරෙහි ද බලපෑම් එල්ල කළ හැකිය. හෝමුස් සමුද්ර සන්ධිය (Strait of Hormuz) අවහිර වීම සහ මෙලෙස සෞදියේ බලශක්ති කලාපයන් ඉලක්ක කරගනිමින් මිසයිල එල්ල වීම නිසා ජාත්යන්තර තෙල් සැපයුමට බාධා එල්ල වීමේ අවදානමක් පවතින බව ආරක්ෂක විචාරකයෝ පෙන්වා දෙති. කෙසේ වෙතත් මෙම ප්රහාරවලින් ජීවිත හෝ දේපළ හානි පිළිබඳව මෙතෙක් තොරතුරු වාර්තා වී නොමැති අතර, සෞදි අරාබිය සිය අහස් සීමාවේ ආරක්ෂාව තවදුරටත් තහවුරු කරමින් සිටියි.
