ඉන්දියාවේ ප්රමුඛතම ගුවන් සේවයක් වන ඉන්ඩිගෝ (IndiGo) එයාර්ලයින්ස්, දිල්ලි සහ කොළඹ අතර නව සෘජු ගුවන් ගමන් සේවාවක් ආරම්භ කරමින් ඉන්දියාව සහ ශ්රී ලංකාව අතර ගුවන් සබඳතා තවදුරටත් ශක්තිමත් කිරීමට පියවර ගෙන තිබේ. 2026 මාර්තු 29 වනදා සිට ක්රියාත්මක වන මෙම නව සේවාව එයාර්බස් A320 යානා යොදා ගනිමින් සතියකට දින හයක් ක්රියාත්මක වනු ඇත.
මෙම නව ගුවන් මාර්ගය හඳුන්වා දීම තුළින් දෙරට අතර පවතින දීර්ඝකාලීන සබඳතා තවදුරටත් වර්ධනය වන අතර, විශේෂයෙන්ම සංචාරක ව්යාපාරය, වෙළඳාම සහ ව්යාපාරික කටයුතු සඳහා පැමිණෙන මගීන්ට වඩාත් පහසු සහ කාර්යක්ෂම ගමන් පහසුකම් සැලසෙනු ඇතැයි අපේක්ෂා කෙරේ. ඉන්ඩිගෝ ගුවන් සේවය දැනටමත් මුම්බායි, බැංගලෝර්, හයිද්රාබාද් සහ චෙන්නායි යන නගරවල සිට කොළඹ දක්වා සතිපතා ගුවන් වාර 55කට වඩා ක්රියාත්මක කරනු ලබයි.
මීට අමතරව, චෙන්නායි සහ තිරුචිරප්පල්ලි සිට යාපනය දක්වා ද සතිපතා ගුවන් වාර 10ක් ක්රියාත්මක කරමින් ඉන්ඩිගෝ ගුවන් සේවය ශ්රී ලංකාව තුළ සිය මෙහෙයුම් ජාලය වේගයෙන් ව්යාප්ත කරමින් සිටියි. සහනදායී මිල ගණන් යටතේ විශ්වාසනීය ගුවන් සේවාවක් සැපයීම සිය අරමුණ බව එම ගුවන් සේවය පවසයි. මෙම නව සේවාවත් සමඟ ඉන්දියාවේ ප්රධාන නගර පහක් සෘජුවම කොළඹ සමඟ සම්බන්ධ වීම දෙරටේම ආර්ථිකයට ධනාත්මක බලපෑමක් වනු ඇත.
