විදේශ රටවල සැඟව සිටින දරුණු ගණයේ අපරාධකරුවන් මෙරටට ගෙන්වා ගැනීමේ විශේෂ වැඩපිළිවෙළ යටතේ පසුගිය වසර තුන තුළ සැකකරුවන් 30 දෙනෙකු මෙරටට රැගෙන ඒමට සමත් වූ බව පොලිස් මාධ්ය ප්රකාශක, සහකාර පොලිස් අධිකාරී එෆ්.යූ. වුට්ලර් මහතා අද (30) කොළඹ පැවැති ප්රවෘත්ති සාකච්ඡාවකදී අනාවරණය කළේය. අද උදෑසන ඕමානයේ සිට මෙරටට රැගෙන ආ සංවිධානාත්මක අපරාධ කල්ලි සාමාජිකයෙකු වන ප්රභාත් මධුසංඛ හෙවත් ‘මිදිගම චූටි’ ද එම පිරිසට අයත් වන අතර, ඔහු මිනීමැරුම්, මත්ද්රව්ය හා ගිනිඅවි ජාවාරම් ඇතුළු බරපතළ ගණයේ අපරාධ රැසකට සම්බන්ධ අයෙකු ලෙස හඳුනාගෙන තිබේ. සැකකරු අධිකරණයට ඉදිරිපත් කිරීමෙන් අනතුරුව රඳවා ගැනීමේ නියෝග ලබාගෙන අපරාධ පරීක්ෂණ දෙපාර්තමේන්තුව (CID) මඟින් ඉදිරි විමර්ශන සඳහා වැඩිදුර ප්රශ්න කිරීමට නියමිතය.
ශ්රී ලංකාව සතු ජාත්යන්තර සබඳතා ශක්තිමත් වීම හේතුවෙන් ජාත්යන්තර රතු නිවේදන නොමැතිව වුවද සැකකරුවන් 13 දෙනෙකු මෙරටට ගෙන්වා ගැනීමට හැකියාව ලැබී ඇති බවත්, ඉන් දෙදෙනෙකු පසුගිය 28 වනදා ඉන්දියාවේ සිට රැගෙන ආ බවත් මාධ්ය ප්රකාශකවරයා මෙහිදී සඳහන් කළේය. දැනට සංවිධානාත්මක අපරාධකරුවන් 88 දෙනෙකු සඳහා රතු නිවේදන නිකුත් කර ඇති අතර, ඔවුන් අත්අඩංගුවට ගැනීමේ මෙහෙයුම් ද අඛණ්ඩව ක්රියාත්මක වේ. මීට අමතරව, ඉදිරි පාස්කු දේව මෙහෙයන් වෙනුවෙන් ත්රිවිධ හමුදාව, පොලිසිය, සිවිල් ආරක්ෂක බලකාය සහ බුද්ධි නිලධාරීන් ඇතුළු විශේෂ ආරක්ෂක බලඇණියක් යෙදවීමට කටයුතු කර ඇති බව ද ඔහු වැඩිදුරටත් අවධාරණය කළේය.
දිවයින පුරා සිදුකළ විශේෂ මෙහෙයුම් මඟින් අනීතික ලෙස රැස්කර තිබූ ඩීසල් ලීටර් 44,811ක්, පෙට්රල් ලීටර් 2,668ක් සහ භූමිතෙල් ලීටර් 2,062ක් සමඟ සැකකරුවන් 27 දෙනෙකු අත්අඩංගුවට ගැනීමට පොලිසිය සමත්ව තිබේ. පවතින ඉන්ධන අර්බුදය හමුවේ මෙලෙස තොග රැස්කරන පුද්ගලයින්ට එරෙහිව නීතිය තදින් ක්රියාත්මක කරන බව ද මෙහිදී ප්රකාශ විය. අවසාන වශයෙන්, ඉෂාරා සෙව්වන්දිගේ උපන්දින සාදයට සම්බන්ධ වූ පොලිස් ස්ථානාධිපතිවරයාට එරෙහිව දැනටමත් දැඩි විනය ක්රියාමාර්ග ගෙන ඇති බව පවසමින් පොලිස් මාධ්ය ප්රකාශකවරයා සිය අදහස් දැක්වීම අවසන් කළේය.
