ශ්රී ලංකාවේ කෘෂිකාර්මික කටයුතුවල නිරත ගොවි ජනතාව සඳහා අවශ්ය ඉන්ධන වඩාත් විධිමත් සහ පහසු ක්රමවේදයකට ලබාදීමේ අරමුණින් ඉදිරියේදී නව QR කේත (QR Code) පද්ධතියක් හඳුන්වා දෙන බව ගොවිජන සංවර්ධන කොමසාරිස් ජනරාල් ධම්මික රණතුංග මහතා අද (30) ප්රකාශ කළේය. රජයේ ප්රවෘත්ති දෙපාර්තමේන්තුවේ පැවැති විශේෂ මාධ්ය සාකච්ඡාවකට එක්වෙමින් ඔහු පෙන්වා දුන්නේ කෘෂිකර්ම ක්ෂේත්රයේ අඛණ්ඩ පැවැත්ම තහවුරු කිරීම සඳහා මෙම පියවර ගන්නා බවයි. මෙම නව ක්රමවේදය හරහා ගොවීන්ට සිය වගා කටයුතු සඳහා අවශ්ය ඩීසල් සහ පෙට්රල් ප්රමාණයන් පෝලිම්වලින් තොරව සහතික කළ ක්රමවේදයකට ලබාගැනීමට අවස්ථාව සැලසේ.
මීට අමතරව පොහොර බෙදාහැරීමේ ක්රියාවලිය පිළිබඳව ද අදහස් දැක්වූ කොමසාරිස් ජනරාල්වරයා අවධාරණය කළේ ගොවීන්ට අවශ්ය පොහොර ඉදිරියේදී ලබාගත හැක්කේ දිවයින පුරා පිහිටි ගොවිජන සේවා මධ්යස්ථාන හරහා පමණක් බවයි. පොහොර බෙදාහැරීමේදී සිදුවන අක්රමිකතා වැළැක්වීමට සහ නියමිත ප්රමිතියෙන් යුතු පොහොර සෘජුවම ගොවියා අතට පත්කිරීම සහතික කිරීම සඳහා මෙම තීරණය ගෙන තිබේ. රජය විසින් කෘෂිකර්ම, ධීවර සහ වරාය වැනි අත්යවශ්ය ක්ෂේත්ර නගාසිටුවීමට ගෙන ඇති වැඩපිළිවෙළ යටතේ මෙම නව ප්රතිසංස්කරණ ක්රියාත්මක වනු ඇත.
