2026 වසරේ දෙවන කාර්තුව සඳහා විදුලි ගාස්තු ඉහළ නැංවීමට ශ්රී ලංකා මහජන උපයෝගීතා කොමිෂන් සභාව (PUCSL) ඒකමතිකව තීරණය කර ඇති අතර මෙම නව සංශෝධනය අප්රේල් මස 1 වනදා සිට ක්රියාත්මක වේ. ලංකා විදුලිබල මණ්ඩලය සියයට 13.56ක වැඩිවීමක් ඉල්ලා තිබුණද, පොදු පාරිභෝගිකයාට සිදුවන බලපෑම සලකා බලා විවිධ කාණ්ඩ යටතේ ගාස්තු සංශෝධනය කිරීමට පියවර ගෙන තිබේ. ඒ අනුව ඒකක 0-30 දක්වා කාණ්ඩය සඳහා සියයට 4.3ක (රු. 15) වැඩිවීමක් ද, ඒකක 31-60 සහ 61-91 දක්වා කාණ්ඩ සඳහා සියයට 6.9ක වැඩිවීමක් ද සිදුකර ඇත. ඒකක 91-180 දක්වා පාරිභෝගිකයින් සඳහා සියයට 7.1ක වැඩිවීමක් සිදුවන අතර ඒකක 180ට වැඩි ඉහළ පරිභෝජනයක් සහිත කාණ්ඩ සඳහා සියයට 25ක සැලකිය යුතු ගාස්තු වැඩිවීමක් සිදු කිරීමට තීරණය කර තිබේ.
ආගමික හා පුණ්ය ආයතන සම්බන්ධයෙන් විශේෂ අවධානයක් යොමු කර ඇති අතර, ඒකක 180ට අඩු පරිභෝජනයක් සහිත ආයතන සඳහා ගාස්තු ඉහළ නොදැමීමටත්, ඒකක 180ට වැඩි පරිභෝජනය සඳහා පමණක් සියයට 9.6ක වැඩිවීමක් සිදු කිරීමටත් පියවර ගෙන ඇත. මීට අමතරව පොදු කාර්ය පාරිභෝගිකයින් සඳහා සියයට 8ක සහ කර්මාන්ත අංශය සඳහා සියයට 8.7ක ගාස්තු වැඩිවීමක් අනුමත කර තිබේ. රජයේ ආයතන සඳහා සියයට 14.1ක ඉහළ අගයකින් විදුලි ගාස්තු සංශෝධනය කිරීමට ද මහජන උපයෝගීතා කොමිසම තීරණය කර ඇත. මෙම සංශෝධනය මඟින් පිරිවැය කළමනාකරණය කරගනිමින් විදුලිබල ක්ෂේත්රයේ ස්ථාවරත්වය පවත්වා ගැනීම අපේක්ෂා කෙරේ.
