මැදපෙරදිග කලාපයේ පවතින යුදමය වාතාවරණය සහ ලෝක වෙළෙඳපොළේ ඉන්ධන මිල ඉහළ යාම සැළකිල්ලට ගනිමින්, අවශ්ය වුවහොත් ඉදිරියේදී නැවතත් විදුලි ගාස්තු සංශෝධනයක් යෝජනා කිරීමට ලංකා විදුලිබල මණ්ඩලයට හැකියාව පවතින බව ශ්රී ලංකා මහජන උපයෝගිතා කොමිෂන් සභාව පවසයි.
මේ අතර හෙට සිට ක්රියාත්මක වන පරිදි විදුලි ගාස්තු විවිධ පරාසයන් යටතේ සියයට 4.3 සිට සියයට 25.3 දක්වා ඉහළ නැංවීමට මහජන උපයෝගිතා කොමිසම ඊයේ (30) විදුලිබල මණ්ඩලයට අවසර ලබා දී තිබේ. ඒ අනුව ගෘහස්ථ කාණ්ඩයේ ඒකක 0 සිට 30 දක්වා වූ අවම ඒකකයක ගාස්තුව රුපියල් 4.50 සිට රුපියල් 5 දක්වා ඉහළ දමා ඇති අතර, එහි මාසික ස්ථාවර ගාස්තුව ද ඇතුළුව උපරිම විදුලි ගාස්තුව රුපියල් 230ක් බවට පත්වනු ඇත. ඒකක 31 සිට 60 දක්වා වූ කාණ්ඩයේ ඒකකයක මිල රුපියල් 8 සිට රුපියල් 9 දක්වා ද, ඒකක 61 සිට 90 දක්වා වූ කාණ්ඩයේ ඒකකයක මිල රුපියල් 18.50 සිට රුපියල් 20 දක්වා ද ඉහළ නංවා ඇති අතර එම කාණ්ඩවල උපරිම මාසික ගාස්තු පිළිවෙළින් රුපියල් 630ක් සහ රුපියල් 1,840ක් ලෙස සටහන් වේ.
මීට අමතරව ඒකක 91 සිට 120 දක්වා කාණ්ඩයේ ඒකකයක මිල රුපියල් 24 සිට රුපියල් 28 දක්වා ද, ඒකක 121 සිට 180 දක්වා වූ කාණ්ඩයේ ඒකකයක මිල රුපියල් 41 සිට රුපියල් 44 දක්වා ද ඉහළ දමා තිබේ. ඉහළම විදුලි පරිභෝජනයක් සහිත ඒකක 180ට වැඩි කාණ්ඩයේ රුපියල් 61ක්ව පැවති ඒකකයක මිල සියයට 25.3කින් ඉහළ දමා ඇති අතර එහි නව ඒකකයක මිල රුපියල් 85ක් වනු ඇත.
කෙසේ වෙතත් මෙම නව ගාස්තු සංශෝධනය යටතේ මාසික විදුලි පරිභෝජනය ඒකක 180ට වඩා අඩු ආගමික හා පුණ්ය ස්ථාන සඳහා ගාස්තු ඉහළ නොදැමීමට තීරණය කර ඇති අතර, ඒකක 180ට වැඩි ආගමික ස්ථාන සඳහා සියයට 9.6ක ගාස්තු වැඩිවීමක් සිදුවේ. එසේම අනෙකුත් ක්ෂේත්ර සලකා බැලීමේදී කර්මාන්ත අංශය සඳහා සියයට 8.7ක් ද, හෝටල් අංශය සඳහා සියයට 9.9ක් ද, රාජ්ය ආයතන සඳහා සියයට 14.4ක් සහ පොදු කාර්ය පාරිභෝගිකයින් සඳහා සියයට 8ක් වශයෙන් ගාස්තු ඉහළ නංවා ඇත.
