මඩකලපුව ප්රදේශයේදී රන් භාණ්ඩ කොල්ලකා පාළු ළිඳකට දමා තිබියදී දිවි බේරාගත් කාන්තාව තමා මුහුණදුන් බියකරු අත්දැකීම පිළිබඳව පොලීසිය හමුවේ විශේෂ පාපොච්චාරණයක් සිදුකර තිබේ.
පසුගිය 20 වනදා සිදු වූ මෙම බියකරු සිදුවීම විස්තර කරමින් ඇය පවසා ඇත්තේ ත්රීරෝද රථයකින් ගමන් කරමින් සිටියදී තමාට සිහි නැති වන සේ යම් ද්රව්යයක් අඩංගු බීම බෝතලයක් පානය කිරීමට ලබා දුන් බවයි. එම ත්රීරෝද රථයේ සිටි පුද්ගලයන් සන්තකයේ පේපර් කටර් එකක් තිබීම ගැන විමසූ විට ඔවුන් පවසා ඇත්තේ සතුන්ට තණකොළ කැපීමට එය රැගෙන යන බවයි. පසුව ත්රීරෝද රථය වෙනත් මාර්ගයක ධාවනය කිරීම පිළිබඳව ප්රශ්න කිරීමේදී එහි සිටි තරුණයෙකු වෙනත් ස්ථානයකට ඇරලවීමට යන බව පවසා ඇති අතර ඉන් විනාඩි කිහිපයකට පසු තමාට සිහිය නැති වූ බව ඇය පවසා ඇත.
මෙම අපරාධය සම්බන්ධයෙන් සිදුකළ දීර්ඝ විමර්ශනවලින් අනතුරුව සිද්ධියට සෘජුවම සම්බන්ධ සැකකරුවන් තිදෙනෙකු, කොල්ලකන ලද රන් ආභරණ මිලදී ගත් බව කියන පුද්ගලයන් දෙදෙනෙකු සහ සිහි නැති කිරීමේ ඖෂධ ලබා දුන් බවට සැකකෙරෙන ඖෂධසල් හිමිකරුවෙකු ද පොලිසිය විසින් අත්අඩංගුවට ගෙන තිබේ. ප්රදේශවාසීන් කළ දැනුම්දීමකට අනුව මෙම කාන්තාව ළිඳෙන් බේරාගත් අවස්ථාවේදී එම ළිඳේම තිබී තවත් කාන්තා මළ සිරුරක් ද සොයා ගැනීමට පොලීසියට හැකි වී ඇත.
