මීතොටමුල්ල ප්රදේශයේ නීතිවිරෝධී ලෙස සහ අවිධිමත් ලෙස කසළ බැහැර කිරීම මඟින් කොළඹ මහා නගර සභාව, කොලොන්නාව නගර සභාව සහ නාගරික සංවර්ධන අධිකාරිය ඇතුළු ප්රධාන රාජ්ය ආයතන කිහිපයක් එදිනෙදා ජීවත් වූ ප්රදේශවාසීන්ගේ මූලික අයිතිවාසිකම් උල්ලංඝනය කර ඇති බව ශ්රේෂ්ඨාධිකරණය අද (31) ප්රකාශ කළේය.
විශේෂයෙන්ම 2009 වසරේ සිට 2017 වසර දක්වා වූ දීර්ඝ කාලසීමාවක් පුරා මීතොටමුල්ල පොතුවිල් කුඹුර ප්රදේශයේ මෙලෙස නීතිවිරෝධී ලෙස කසළ බැහැර කිරීම හේතුවෙන් පීඩාවට පත් වූ ජනතාවගේ ආණ්ඩුක්රම ව්යවස්ථාවෙන් සහතික කර ඇති මූලික අයිතිවාසිකම් උල්ලංඝනය වී ඇති බව අධිකරණය විසින් තහවුරු කරන ලදී. නීතිඥ නුවන් බෝපගේ මහතා ඇතුළු මීතොටමුල්ල ප්රදේශවාසීන් පිරිසක් විසින් ගොනු කරන ලද මූලික අයිතිවාසිකම් පෙත්සම් දෙකකට අදාළව මෙම තීන්දුව ප්රකාශයට පත් විය. දීර්ඝ කාලයක් තිස්සේ පරිසරයට මෙන්ම මහජන සෞඛ්යයට දැඩි තර්ජනයක්ව පැවති මෙම මීතොටමුල්ල කුණු කන්ද අඛණ්ඩව පවත්වාගෙන යාම සහ එය තවදුරටත් ව්යාප්ත කිරීම අභියෝගයට ලක් කරමින් මෙම පෙත්සම් ගොනු කර තිබුණි.
අගවිනිසුරු ප්රීති පද්මන් සූරසේන, යසන්ත කෝදගොඩ සහ ප්රියන්ත ප්රනාන්දු යන ත්රිපුද්ගල ශ්රේෂ්ඨාධිකරණ විනිසුරු මඩුල්ල විසින් මෙම තීන්දුව ලබා දෙන ලදී. එහිදී බස්නාහිර පළාත් අපද්රව්ය කළමනාකරණ අධිකාරිය සහ මධ්යම පරිසර අධිකාරිය ඇතුළු ආයතන කිහිපයක් විසින් ආණ්ඩුක්රම ව්යවස්ථාවේ 12 (1) වගන්තිය යටතේ සහතික කර ඇති නීතිය ඉදිරියේ සමාන සැලකිලි ලැබීමේ මූලික අයිතිවාසිකම උල්ලංඝනය කර ඇති බව විනිසුරු මඩුල්ල විසින් තීරණය කරන ලදී. කෙසේ වෙතත් පීඩාවට පත් වූවන් සඳහා තවදුරටත් අමතර වන්දි මුදල් ගෙවීමට නියෝග කිරීමෙන් අධිකරණය වැළකී සිටි අතර එයට හේතුව ලෙස දක්වා ඇත්තේ මීතොටමුල්ල කුණු කන්ද කඩා වැටීමෙන් විපතට පත් වූවන් සඳහා වගඋත්තරකරුවන් විසින් ඒ වන විටත් රුපියල් මිලියන 908ක සමස්ත වන්දි මුදලක් ගෙවා අවසන් කර තිබීමයි.
පෙත්සම්කරුවන් කිහිපදෙනෙකු වෙනුවෙන් ජනාධිපති නීතිඥ සාලිය පීරිස් මහතා ඇතුළු නීතිඥ මඩුල්ලක් පෙනී සිටි අතර අනෙකුත් පෙත්සම්කරුවන් වෙනුවෙන් ජනාධිපති නීතිඥ එරාජ් ද සිල්වා මහතා ප්රමුඛ නීතිඥ කණ්ඩායමක් අධිකරණය හමුවේ කරුණු දක්වා තිබුණි.
