ඉරානය සහ ඇමරිකාව අතර පවතින දරුණු යුදමය වාතාවරණය හමුවේ ආරක්ෂක රාජකාරි සහ මුරපොළවල් සඳහා වයස අවුරුදු 12ක පමණ කුඩා දරුවන් යොදාගැනීමට ඉරාන බලධාරීන් පියවර ගෙන ඇති බව බීබීසී පුවත් සේවය වාර්තා කරයි. පසුගියදා ටෙහෙරාන් නුවර ආරක්ෂක මුරපොළක පියෙකු සමඟ සේවය කරමින් සිටි 11 හැවිරිදි පාසල් සිසුවෙකු ගුවන් ප්රහාරයකින් මියයාමත් සමඟ මෙම අමානුෂික ක්රියාව ලොව පුරා දැඩි කතාබහට ලක්ව තිබේ. ඉරාන විප්ලවීය ආරක්ෂක බලකාය (IRGC) මේ වන විට වයස අවුරුදු 12න් ඉහළ ස්වේච්ඡා සේවකයන් බඳවා ගන්නා බව නිල වශයෙන් ද නිවේදනය කර ඇත.
ටෙහෙරාන් සහ රෂ්ට් වැනි නගරවල වීදි මුරපොළවල්වල මුහුණු ආවරණය කරගත් කුඩා දරුවන් නවීන ගිනිඅවි අතැතිව වාහන පරීක්ෂා කරන අයුරු ඇසින් දුටු සාක්ෂිකරුවන් කිහිප දෙනෙකු විසින් තහවුරු කර තිබේ. ඇතැම් දරුවන්ගේ උස සහ ඇස් දෙස බැලූ විට ඔවුන් ඉතා කුඩා දරුවන් බව පැහැදිලි වන බවත් ඔවුන් වැඩිහිටි සෙබළුන් ඉදිරියේ ආරක්ෂක වැටවල් ලෙස යොදවා ඇති බවත් ප්රදේශවාසීන් පවසයි. ජාත්යන්තර මානව හිමිකම් සංවිධාන පෙන්වා දෙන්නේ වයස අවුරුදු 15ට අඩු දරුවන් යුද කටයුතු සඳහා යොදාගැනීම බරපතල යුද අපරාධයක් බවයි.
දේශපාලන විශ්ලේෂකයන් පවසන්නේ වැඩිහිටි පුද්ගලයන් ආරක්ෂක අංශවලට බඳවා ගැනීමට පවතින අපහසුතාවය සහ පාලන තන්ත්රය පිළිබඳව ජනතාව තුළ පවතින අප්රසාදය නිසා ඉරානය මෙලෙස දරුවන් යුද්ධයට කැප කරන බවයි. පුහුණුවක් නොමැති කුඩා දරුවන් අතට ගිනිඅවි ලබාදීම සිවිල් වැසියන්ගේ මෙන්ම එම දරුවන්ගේ ද ජීවිත දැඩි අවදානමකට ලක් කිරීමක් බව නීති විශේෂඥයෝ අවධාරණය කරති. ඉරානය සිය පැවැත්ම වෙනුවෙන් කුඩා දරුවන්ගේ ජීවිත මෙලෙස බිල්ලට දීම ලෝකයේම දැඩි පිළිකුලට ලක්වෙමින් පවතී.
