අද (01) සිට ක්රියාත්මක වන පරිදි විදුලි ගාස්තු ඉහළ දැමීමට ලංකා විදුලිබල මණ්ඩලය ඉදිරිපත් කළ යෝජනාවට මහජන උපයෝගිතා කොමිසම අනුමැතිය ලබා දී තිබේ. ඒ අනුව සමස්තයක් ලෙස විදුලි ගාස්තු 10%කින් පමණ ඉහළ යන අතර ගෘහස්ථ පරිභෝජනයේදී ඒකක 180ට වඩා වැඩි පිරිසට 25.3%ක දැවැන්ත ගාස්තු වැඩිවීමක් අත්විඳීමට සිදුවනු ඇත. ඒකක 30ට අඩු කාණ්ඩය සඳහා රුපියල් 15කින් ද ඒකක 31 සිට 60 දක්වා කාණ්ඩය සඳහා රුපියල් 45කින් ද මාසික ගාස්තුව ඉහළ යනු ඇත.
විදුලි ගාස්තු මෙලෙස ඉහළ යාමත් සමඟ අද සිට ක්රියාත්මක වන පරිදි ආහාර පාන වර්ග කිහිපයක මිල ගණන් ඉහළ දැමීමට සමස්ත ලංකා ආපනශාලා හිමියන්ගේ සංගමය තීරණය කර තිබේ. ඒ අනුව ෆ්රයිඩ් රයිස් සහ කොත්තු මිල රුපියල් 30කින් ද කෙටි ආහාර වර්ග රුපියල් 10කින් ද ඉහළ දමා ඇත. එමෙන්ම කිරි තේ සහ ප්ලේන් ටී මිල රුපියල් 5කින් ඉහළ යන බව එම සංගමය නිවේදනය කරයි. ආපනශාලා බොහොමයක විදුලි පරිභෝජනය ඒකක 180 ඉක්මවන බැවින් මෙම මිල ඉහළ දැමීම අනිවාර්ය වූ බව ඔවුහු පවසති.
රාජ්ය ආයතන සඳහා විදුලි ගාස්තු 14.4%කින් ඉහළ දමා ඇති අතර කාර්මික අංශය සඳහා 8.7%ක වැඩිවීමක් සිදු කර ඇත. ආගමික හා පුණ්යායතන සඳහා ඒකක 180ට අඩු පරිභෝජනයේදී ගාස්තු ඉහළ දමා නොමැති වුවද ඒකක 180 ඉක්මවන අවස්ථාවලදී 9.6%ක වැඩිවීමක් සිදු වේ. පවතින ආර්ථික අපහසුතා මධ්යයේ විදුලි සහ ආහාර මිල මෙලෙස ඉහළ යාම ජනතාවට තවත් දැඩි බරක් වනු ඇතැයි අපේක්ෂා කෙරේ.
