තම රටේ නායකයන් ඉලක්ක කර ගනිමින් සිදුකරන ඝාතන මෙහෙයුම් සඳහා ඇමරිකානු තාක්ෂණික සමාගම් සහ කෘතිම බුද්ධිය (AI) භාවිතා කරන බව පවසමින් එම සමාගම්වලට ප්රහාර එල්ල කරන බවට ඉරානය අනතුරු අඟවයි. ඉරාන විප්ලවීය ආරක්ෂක බලකාය (IRGC) නිවේදනය කර ඇත්තේ මින් ඉදිරියට ඇපල්, මයික්රොසොෆ්ට්, ගූගල්, මෙටා, ටෙස්ලා සහ බෝයිං ඇතුළු ප්රමුඛ පෙළේ ඇමරිකානු සමාගම් 17ක් තම හමුදාවන්ගේ ඉලක්ක බවට පත්වන බවයි. මෙම සමාගම්වල මැදපෙරදිග කලාපයේ පිහිටි කාර්යාලවල සේවකයන්ට වහාම එම ස්ථානවලින් ඉවත් වන ලෙස ද ඉරානය දැනුම් දී තිබේ.
අද (01) දින ටෙහෙරාන් වේලාවෙන් රාත්රී 8 සිට ක්රියාත්මක වන පරිදි මෙම සමාගම්වල ඒකක විනාශ කිරීමට බලාපොරොත්තු වන බව ඉරානය පවසන අතර එම කාර්යාල අසල පදිංචි වැසියන්ට ද ආරක්ෂිත ස්ථාන කරා යන ලෙස උපදෙස් දී ඇත. ඉරාන නායකයන් ඝාතනය කිරීමේ සැලසුම් සඳහා මෙම සමාගම් සෘජුවම දායක වන බවට ඉරානය චෝදනා කරයි. මීට අමතරව අයිබීඑම්, ඉන්ටෙල්, එච්පී සහ ජේපී මොර්ගන් වැනි මූල්ය සහ තාක්ෂණික ආයතන ද ඉරානයේ මෙම තර්ජනයට ලක් වූ ලැයිස්තුවට ඇතුළත් කර තිබේ.
මෙම තර්ජනයත් සමඟ ලෝක වෙළඳපොළේ තාක්ෂණික සමාගම්වල කොටස් මිල ගණන් පිළිබඳව ද යම් අවිනිශ්චිතතාවයක් මතු වී ඇත. ඉරානයේ මෙම ප්රකාශය ලෝක දේශපාලනයේ මෙන්ම තාක්ෂණික ක්ෂේත්රයේ ද දැඩි කැළඹීමක් ඇති කර තිබේ. ඇමරිකානු බලධාරීන් මෙම තර්ජනය පිළිබඳව මෙතෙක් නිල ප්රකාශයක් කර නොමැති වුවද ආරක්ෂක පියවර දැඩි කර ඇති බව වාර්තා වේ.
