ඊශ්රායල හමුදා විසින් අද (01) අලුයම ලෙබනනයේ බීරූට් අගනුවර ඉලක්ක කර එල්ල කරන ලද ප්රබල ගුවන් ප්රහාරවලින් පුද්ගලයන් හත් දෙනෙකු ජීවිතක්ෂයට පත්ව ඇති බව ලෙබනන සෞඛ්ය අමාත්යාංශය තහවුරු කරයි. හිස්බුල්ලා සංවිධානයේ ජ්යෙෂ්ඨ අණදෙන නිලධාරියෙකු ඉලක්ක කර මෙම ප්රහාර එල්ල කළ බව ඊශ්රායලය පවසන අතර, යුද්ධයෙන් පසු දකුණු ලෙබනනයේ ආරක්ෂක කලාපයක් ස්ථාපිත කරන බවට එරට ආරක්ෂක අමාත්යවරයා කළ ප්රකාශයත් සමඟ තත්ත්වය තවදුරටත් උණුසුම් වී තිබේ.
බීරූට් නගරයේ ජනා (Jnah) ප්රදේශයට එල්ල වූ ප්රහාරයකින් පස් දෙනෙකු මියගොස් 21 දෙනෙකු තුවාල ලබා ඇති අතර, අගනුවරට දකුණින් පිහිටි ඛල්ඩේ (Khaldeh) ප්රදේශයේදී වාහනයකට එල්ල වූ ප්රහාරයකින් තවත් දෙදෙනෙකු මියගොස් තිබේ. මීට අමතරව දකුණු ලෙබනනයට එල්ල වූ ප්රහාරවලින් සහන සේවකයෙකු ඇතුළු අට දෙනෙකු ජීවිතක්ෂයට පත්ව ඇති අතර 30කට අධික පිරිසක් තුවාල ලබා ඇත.
ඊශ්රායල ආරක්ෂක අමාත්ය ඉස්රායල් කැට්ස් (Israel Katz) ප්රකාශ කළේ, හමුදා මෙහෙයුම අවසානයේ දකුණු ලෙබනනයේ ලිටානි ගඟ දක්වා (දේශසීමාවේ සිට කිලෝමීටර් 30ක් ඇතුළත) ප්රදේශයේ පූර්ණ ආරක්ෂක පාලනය ඊශ්රායලය සතු කරගන්නා බවයි. දේශසීමාව අසල පිහිටි ලෙබනන ගම්මානවල සියලුම නිවාස විනාශ කරන බවත්, උතුරු ඊශ්රායලයේ ආරක්ෂාව තහවුරු වන තෙක් අවතැන් වූ ලෙබනන වැසියන්ට නැවත පැමිණීමට ඉඩ නොදෙන බවත් ඔහු අවධාරණය කළේය.
ලෙබනන ආරක්ෂක අමාත්ය මිෂෙල් මෙනසා (Michel Menassa) මෙම ප්රකාශය දැඩි ලෙස හෙළා දකිමින් කියා සිටියේ, මෙය ලෙබනනයේ ස්වෛරීභාවය උල්ලංඝනය කරමින් බලහත්කාරයෙන් භූමිය අත්පත් කරගැනීමේ පැහැදිලි සැලසුමක් බවයි. කැනඩා අගමැති මාර්ක් කාර්නි (Mark Carney) ද මෙම ක්රියාව “නීති විරෝධී ආක්රමණයක්” ලෙස හඳුන්වමින් සිය විරෝධය පළ කර ඇත. මාර්තු 02 වනදා සිට ඇරඹුණු මෙම ගැටුම්වලින් මේ වන විට ලෙබනනයේ 1,200කට අධික පිරිසක් මියගොස් මිලියනයකට අධික පිරිසක් අවතැන් වී තිබේ.
