ශ්රී ලංකාවේ ළමා ලිංගික අපයෝජනයට ලක්වූවන් වෙනුවෙන් වසර 20ක් පුරා අඛණ්ඩව සහයෝගය ලබා දුන් Emerge Lanka Foundation ආයතනය, සිය 20 වැනි සංවත්සරය ’20 Years of Rising’ නමින් සංවිධානය කර තිබූ විශේෂ උත්සවයකින් සමරා තිබෙනවා. වින්දිතයන් බවට පත්වූ දරුවන්ගේ සහ තරුණියන්ගේ ජීවිත යළි ගොඩනැගීම සඳහා සහය වීම ඔවුන්ගේ ප්රධානතම අරමුණයි
ආරම්භයේ සිට මේ දක්වා කාලය තුළ වින්දිතයන් 1,800කට අධික පිරිසකට මානසික සුවතාවය, අධ්යාපනය, වෘත්තීය පුහුණුව, ජීවන කුසලතා සංවර්ධනය සහ සමාජගත කිරීම වැනි දිගුකාලීන පුළුල් වැඩසටහන් රැසක් ඔස්සේ මෙම පදනම පිහිට වී ඇත.
සමාජය තුළ මේ පිළිබඳව යම් දැනුවත්භාවයක් ඇතිවුවද, මෙරට ළමා ලිංගික අපයෝජනය තවමත් බරපතල ගැටලුවක්ව පවතින බවත්, දහස් ගණනක් නඩු අධිකරණවල වසර ගණනාවක් තිස්සේ ගොඩගැසී පවතින බවත් ඔවුන් පෙන්වා දෙනවා. මෙලෙස යුක්තිය පසිඳලීම ප්රමාද වන කාලය තුළ වින්දිතයන් සමාජ අපකීර්තියට මෙන්ම විවිධ බාධකයන්ට මුහුණ දෙන අතර Emerge Lanka ආයතනය උත්සාහ කරන්නේ ඔවුන්ට ආරක්ෂිත පරිසරයක් සලසා දෙමින් ඔවුන්ව ආර්ථික හා සමාජීය වශයෙන් සවිබල ගැන්වීමටයි.
Emerge Lanka Foundation හි නිර්මාතෘ සහ ප්රධාන විධායක නිලධාරිනී ආලියා විට්නි-ජොන්සන් (Alia Whitney-Johnson) මහත්මිය සඳහන් කළේ පීඩාවට පත් වූ ගැහැණු දරුවන්ට රැකවරණය පමණක් නොව තම අනාගතය තමන්ටම ගොඩනඟා ගැනීමට අවස්ථාව ලබා දිය යුතුය යන සරල විශ්වාසය මත මීට වසර 20කට පෙර මෙම ආයතනය ආරම්භ කළ බවයි.
