ඉරානය සමඟ පවතින යුදමය වාතාවරණය හේතුවෙන් වසා දමා ඇති හෝමූස් සමුද්ර සන්ධිය (Strait of Hormuz) යළි විවෘත කර ලෝක වෙළඳ මාවත් ආරක්ෂා කිරීම සඳහා බ්රිතාන්යය පෙරමුණ ගන්නා බව එරට අග්රාමාත්ය කීර් ස්ටාමර් (Keir Starmer) ප්රකාශ කළේය. මේ සම්බන්ධයෙන් සාකච්ඡා කිරීම සඳහා විදේශ අමාත්යවරුන්ගේ විශේෂ හමුවක් මෙම සතිය අගදී කැඳවීමට ද ඔහු පියවර ගෙන තිබේ. ඇමෙරිකානු ජනාධිපති ඩොනල්ඩ් ට්රම්ප්ගෙන් එල්ල වන දැඩි බලපෑම් මධ්යයේ වුවද, මෙම ගැටුම බ්රිතාන්යයේ ජාතික අවශ්යතාවලට අනුකූල නොවන බැවින් ඇමෙරිකා-ඉශ්රායල් ඒකාබද්ධ යුද මෙහෙයුම්වලට තම රට සහභාගී නොවන බව ඔහු යළිත් අවධාරණය කළේය.
අග්රාමාත්ය ස්ටාමර් සඳහන් කළේ, “මෙය අපගේ යුද්ධයක් නොවන අතර අපගේ ජාතික අවශ්යතාවලට පටහැනි ගැටුමකට අප මැදිහත් නොවන” බවයි. ඉරානයට එරෙහි යුද්ධයෙන් බැහැරව සිටීමට බ්රිතාන්යය ගෙන ඇති ස්ථාවරය ඔහු මෙහිදී යළි තහවුරු කළේය. එමෙන්ම, ඇමෙරිකාව සමඟ පවතින සබඳතාවල යම් පසුබෑමක් දක්නට ලැබුණ ද, යුරෝපීය රටවල් සමඟ වඩාත් ශක්තිමත් සබඳතා ගොඩනගා ගැනීමට බ්රිතාන්යය කැපවන බව ඔහු වැඩිදුරටත් පැවසීය.
ලෝකයේ තෙල් සැපයුමෙන් පහෙන් එකක් පමණ ප්රවාහනය කෙරෙන හෝමූස් සමුද්ර සන්ධිය අවහිර වීම ගෝලීය ආර්ථිකයට දැඩි බලපෑමක් එල්ල කර ඇති බැවින්, එය යළි විවෘත කිරීම සඳහා බ්රිතාන්යය ප්රමුඛ යුරෝපීය රටවල සහාය ඇතිව මැදිහත් වනු ඇතැයි අපේක්ෂා කෙරේ. ජනාධිපති ට්රම්ප්ගේ යුදවාදී ප්රකාශයන් හමුවේ බ්රිතාන්යයේ මෙම ස්වාධීන තීරණය ජාත්යන්තර දේශපාලන ක්ෂේත්රයේ දැඩි අවධානයට ලක්ව තිබේ.
