තායිවාන රජයේ මෙවර අයවැය අනුමත කිරීම ප්රමාද වීම හේතුවෙන් එරට අවි ආයුධ මිලදී ගැනීම්, නඩත්තු කටයුතු සහ හමුදා පුහුණු කිරීම් සඳහා වෙන් කළ තායිවාන ඩොලර් බිලියන 78ක (ඇමෙරිකානු ඩොලර් බිලියන 2.44ක) මුදලක් ලබා ගැනීම අවදානමකට ලක්ව ඇති බව එරට ආරක්ෂක අමාත්යාංශය අද (02) අනාවරණය කළේය. තායිවානයට එරෙහිව චීනයෙන් එල්ල වන යුදමය බලපෑම් හමුවේ මෙම අයවැය ප්රමාදය ජාතික ආරක්ෂාවට තර්ජනයක් විය හැකි බව බලධාරීන් පෙන්වා දෙයි.
ජනාධිපති ලායි චින්ග්-ටේ (Lai Ching-te) ගේ පරිපාලනය යටතේ 2026 වසර සඳහා ආරක්ෂක වියදම් 22.9%කින් ඉහළ නැංවීමට සැලසුම් කර ඇති අතර, එය එරට දළ දේශීය නිෂ්පාදිතයෙන් 3.32%ක් පමණ වේ. මෙය 2009 වසරෙන් පසු තායිවානය ආරක්ෂක කටයුතු වෙනුවෙන් වෙන් කළ වැඩිම ප්රතිශතයයි. කෙසේ වෙතත්, පාර්ලිමේන්තුවේ බහුතරය හිමි විපක්ෂ කණ්ඩායම් මෙම අයවැය සම්මත කිරීම ප්රමාද කරමින් සිටින අතර, ඔවුන් පවසන්නේ ආරක්ෂක වියදම් ඉහළ නැංවීමට එකඟ වුවද කිසිදු පැහැදිලි කිරීමකින් තොරව “හිස් චෙක්පත්වලට” (Blank cheques) අත්සන් තැබීමට තමන් සූදානම් නොමැති බවයි.
මෙම ප්රමාදය හේතුවෙන් ආරක්ෂක අමාත්යාංශයේ සැලසුම් කළ අයවැයෙන් 21%ක් නියමිත කාලයට ක්රියාත්මක කිරීමට නොහැකි වන බව අයවැය අංශ ප්රධානී යෙන් මින්ග්-ටෙහ් (Yen Ming-teh) මහතා ප්රකාශ කළේය. මීට අමතරව අතිරේක හමුදා වියදම් සඳහා වෙන් කළ ඩොලර් බිලියන 40ක යෝජනාවක් ද දැනට අත්හිටුවා තිබේ. මැදපෙරදිග පවතින යුද තත්ත්වයෙන් උගත් පාඩම් ද අනාගත යුද අභ්යාසවලට එක් කර ගැනීමට තායිවානය බලාපොරොත්තුවෙන් පසුවන බැවින් මෙම මූල්ය අර්බුදය කඩිනමින් විසඳා ගැනීම එරටට අතිශය තීරණාත්මක වී තිබේ.
