යුක්රේනය සමඟ පවතින යුද්ධයේ පස්වන වසරට එළඹෙත්ම, සිය ඩ්රෝන බලකාය සඳහා දක්ෂ තරුණ පිරිස් බඳවා ගැනීමට රුසියාව දැවැන්ත මූල්ය සහ අධ්යාපනික වරප්රසාද ලබාදීමේ වැඩපිළිවෙළක් ආරම්භ කර ඇති බව රොයිටර් පුවත් සේවය වාර්තා කරයි. විශේෂයෙන්ම ඉංජිනේරු සහ තාක්ෂණික අංශවල ඉගෙනුම ලබන සරසවි සිසුන් ඉලක්ක කරගනිමින් මෙම බඳවා ගැනීම් සිදු කෙරේ.
රුසියාවේ විවිධ විශ්වවිද්යාල හරහා සිසුන්ට වසරක කාලයක් සඳහා හමුදාවට බැඳීමට ආරාධනා කෙරෙන අතර, ඒ වෙනුවෙන් රුසියානු රුබල් මිලියන 5.5 සිට 7 දක්වා (ඇමෙරිකානු ඩොලර් 68,000 – 87,000 පමණ) වාර්ෂික වැටුප් සහ දීමනා පිරිනමනු ලැබේ. මීට අමතරව, යුද සේවයෙන් පසු නැවත අධ්යාපනයට පැමිණීමේදී සම්පූර්ණ පාඨමාලා ගාස්තු නිදහස් කිරීම, නොමිලේ නවාතැන් පහසුකම් සහ විශේෂ ශිෂ්යත්ව ලබාදීමට ද පොරොන්දු වී තිබේ. ඩ්රෝන ක්රියාකරුවන් සහ ඉංජිනේරුවන් “නව අත්යවශ්ය පුද්ගලයන්” (The new indispensables) ලෙස හඳුන්වමින් රුසියාව පුරා ප්රචාරක පුවරු ද ප්රදර්ශනය කර ඇත.
මේ අතර රුසියාවේ රියාසාන් (Ryazan) ප්රදේශයේ පෞද්ගලික සහ රාජ්ය අංශයේ සමාගම් වෙත ද සිය සේවකයන් හමුදාවට බැඳීමට යොමු කිරීම සඳහා විශේෂ “සීමාවන්” (Quotas) පනවා තිබේ. ඒ අනුව සේවක සංඛ්යාව මත පදනම්ව අවම වශයෙන් සේවකයන් දෙදෙනෙකු හෝ පස්දෙනෙකු හමුදා සේවයට ලබාදීමට එම සමාගම්වලට සිදුවේ. මෙය පොදු බලමුලු ගැන්වීමක් (General mobilisation) නොවන බව ක්රෙම්ලිනය ප්රකාශ කළ ද, තාක්ෂණික දැනුම සහිත පිරිස් ඩ්රෝන ඒකක වෙත යොමු කිරීම හරහා යුද බිමේ වාසිය ලබා ගැනීමට රුසියාව උත්සාහ කරමින් සිටින බව පැහැදිලි වේ.
