කාශ්මීරයේ ගන්ඩර්බාල් ප්රදේශයේ වනාන්තරයකදී හමුදා මෙහෙයුමකින් සටන්කාමියෙකු මියගිය බවට යුද හමුදාව කළ ප්රකාශයත් සමඟ විශාල මතභේදයක් හටගෙන තිබේ. මියගිය පුද්ගලයා කිසිදු සටන්කාමී කණ්ඩායමකට සම්බන්ධ නොමැති සාමාන්ය වැසියෙකු බව ඔහුගේ පවුලේ සාමාජිකයන් පවසන අතර, ඒ පිළිබඳව විධිමත් පරීක්ෂණයක් පවත්වන ලෙස ඔවුහු ඉල්ලා සිටිති.
මියගිය රෂීඩ් අහමඩ් මුගල් (Rashid Ahmad Mughal) නමැති 28 හැවිරිදි තරුණයා වාණිජවේදී පශ්චාත් උපාධිධාරියෙකු (M.Com) වන අතර, ඔහු අර්ධකාලීනව පරිගණක ක්රියාකරුවෙකු ලෙස සේවය කළ අයෙකු බව ඔහුගේ සහෝදරයා පවසයි. ඔහු ප්රදේශවාසීන්ට විවිධ සහතික පත්ර සඳහා මාර්ගගතව අයදුම්පත් පිරවීමට සහ බැංකු ණය ලේඛන සකස් කිරීමට උදව් කළ අයෙකු බවත්, ඔහුට එරෙහිව කිසිදු අපරාධ වාර්තාවක් නොමැති බවත් පවුලේ අය අවධාරණය කරති.
කෙසේ වෙතත්, පොලිසිය පවසන්නේ මියගිය පුද්ගලයාගේ සහෝදරයෙකු පාකිස්ථානයේ සිටින බවත්, හමුදා මෙහෙයුම අතරතුරදී ඔහු සතුව තිබී AK-56 වර්ගයේ ගිනි අවියක් සොයාගත් බවත්ය. රෂීඩ් හට සටන්කාමී කණ්ඩායම් සමඟ පැවති සම්බන්ධතා පිළිබඳව තවදුරටත් විමර්ශනය කරන බව ජ්යෙෂ්ඨ පොලිස් අධිකාරී ඛලීල් අහමඩ් පොස්වාල් (Khalil Ahmad Poswal) මහතා ප්රකාශ කර තිබේ. හමුදාව පවසන්නේ පවුලේ සාමාජිකයන්ට ඕනෑම ප්රකාශයක් කළ හැකි නමුත් විමර්ශන අවසානයේදී සත්යය හෙළි වනු ඇති බවයි.
