ශ්රේෂ්ඨාධිකරණ සහ අභියාචනාධිකරණ විනිසුරුවන්ගේ පමණක් විශ්රාම ගැනීමේ වයස අවුරුදු දෙකකින් දීර්ඝ කිරීමට ආණ්ඩුව සූදානම් වන බවත් එය අධිකරණයේ ස්වාධීනත්වයට ඉතාම අහිතකර මෙන්ම අපහාසාත්මක තීරණයක් බවත් හිටපු අමාත්යවරයකු වන මහාචාර්ය ජී. එල්. පීරිස් මහතා පවසනවා. බොරැල්ලේ පිහිටි ආචාර්ය එන්. එම්. පෙරේරා කේන්ද්රයේදී අද (02) පැවැති විශේෂ මාධ්ය හමුවකට එක්වෙමිනුයි ඒ මහතා මේ බව කියා සිටියේ.
ස්වාධීන අධිකරණයක් පැවතීම ඕනෑම ප්රජාතන්ත්රවාදී සමාජයක අනිවාර්ය ලක්ෂණයක් වන අතර අධිකරණයේ ගෞරවයට සහ ස්වාධීනත්වයට දැඩි පහරක් වන මෙවැනි තීරණයක් ගැනීමට වර්තමාන ආණ්ඩුව සූදානම් වන බවටයි ඔහු චෝදනා කරන්නේ. ශ්රේෂ්ඨාධිකරණ විනිසුරුවරුන්ගේ විශ්රාම ලබන වයස අවුරුදු 65 ලෙසත්, අභියාචනාධිකරණ විනිසුරුවන්ගේ විශ්රාම ලබන වයස අවුරුදු 63 ලෙසත්, මෙරට උත්රීතර නීතිය වන ආණ්ඩුක්රම ව්යවස්ථාවෙන්ම දක්වා ඇත්තේ අධිකරණයේ සහ විනිසුරුවන්ගේ ගෞරවය සහ තේජස රැකගැනීමට බව මහාචාර්ය ජී. එල්. පීරිස් මහතා මෙහිදී පෙන්වා දුන්නා.
එසේම ශ්රේෂ්ඨාධිකරණ සහ අභියාචනාධිකරණ විනිසුරුවන්ගේ පමණක් විශ්රාම ගැනීමේ වයස අවුරුදු දෙකකින් දීර්ඝ කිරීමෙන් සමස්ත රාජ්ය සේවයේම දැවැන්ත ගැටලුවක් නිර්මාණය වන බවත් ඔහු පවසනවා. විශ්වවිද්යාල මහාචාර්යවරයකුගේ විශ්රාම ගැනීමේ වයසද අවුරුදු 65 ක් වන අතර රාජ්ය සේවයේ තවත් ඉහළ තනතුරක් වන විශ්වවිද්යාල මහාචාර්යවරුන්ගේ විශ්රාම ගැන්වීමේ වයස ඉහළ නොදමා මෙලෙස එක් පාර්ශවයකට පමණක් වයස ඉහළ දැමීමෙන් දැඩි අර්බුදයක් උද්ගත වන බවද ඒ මහතා වැඩිදුරටත් සඳහන් කළා.
