ගෝලීය ආරක්ෂක අභියෝග හමුවේ සිය ගුවන් ආරක්ෂණ ශක්තිය ඉහළ නැංවීම සඳහා ස්වීඩන රජය අද (02) යුරෝ මිලියන 796ක (ඇමරිකානු ඩොලර් මිලියන 916ක) සුවිශේෂී ආයෝජනයක් නිවේදනය කළේය. මෙම ආයෝජනය හරහා රේඩාර් පද්ධති, ගුවන් යානා නාශක අවි සහ විද්යුත් යුධ මෙහෙයුම් වේදිකා (Electronic warfare platforms) ඇතුළු නවීන ආරක්ෂක පද්ධති රැසක් ස්ථාපිත කිරීමට නියමිතය.
ස්වීඩන ආරක්ෂක අමාත්ය පෝල් ජොන්සන් (Pal Johnson) ප්රකාශ කළේ, වර්තමාන ලෝක තත්ත්වය හමුවේ ගුවන් ආරක්ෂණ පද්ධති සඳහා ආයෝජනය කිරීම වෙන කවරදාටත් වඩා වැදගත් වී ඇති බවයි. නේටෝ (NATO) සංවිධානයේ සාමාජික රටවල් ද මෙම ස්ථාවරය අනුමත කර ඇති අතර, ස්වීඩනය සිය ආරක්ෂක වියදම් ඉහළ නැංවීම සඳහා ජනවාරි මාසයේදී වෙන් කළ ප්රතිපාදනවලින් අඩකට වඩා වැඩි ප්රමාණයක් මෙම ව්යාපෘතිය සඳහා යොදවා තිබේ.
විශේෂයෙන්ම නූතන යුද බිමේ ඩ්රෝන ප්රහාර එල්ල වීමේ අවදානම ඉහළ ගොස් ඇති බැවින්, ස්වීඩනය ගෙන ඇති මෙම පියවර යුරෝපයේ ආරක්ෂක කලාපය ශක්තිමත් කිරීමට බෙහෙවින් ඉවහල් වනු ඇතැයි ආරක්ෂක විචාරකයෝ පවසති.
