ඉරානය සමඟ පවතින යුදමය වාතාවරණය හේතුවෙන් ඉන්දියාවේ බෝතල් කළ පානීය ජලය සහ බීර ඇතුළු පාන වර්ගවල මිල ගණන් ඉදිරි කාලයේදී ශීඝ්රයෙන් ඉහළ යා හැකි බව වාර්තා වේ. පවතින යුද්ධය නිසා හෝමූස් සමුද්ර සන්ධිය අවහිර වීමෙන් ලෝක වෙළඳපොළේ බොරතෙල් මිල ඉහළ යාම මෙයට ප්රධානතම හේතුව වී තිබේ. ප්ලාස්ටික් බෝතල් නිපදවීමට ගන්නා අමුද්රව්ය බොරතෙල් ආශ්රිත නිෂ්පාදන වන බැවින්, දැනටමත් ඉන්දියාවේ ප්රමුඛතම ජල බෝතල් සන්නාමයක් වන ‘බිස්ලෙරි’ (Bisleri) සිය මිල ගණන් 11% කින් ඉහළ දමා ඇත.
දැනට පවතින දැඩි උණුසුම් කාලගුණය හමුවේ ඉන්දියානුවන් බෝතල් කළ ජලය සඳහා වැඩි වශයෙන් යොමු වී සිටින මොහොතක මෙම මිල ඉහළ යාම ජනතාවට දැඩි බලපෑමක් එල්ල කරයි. මහාරාෂ්ට්ර ප්රාන්තයේ ජල බෝතල් නිෂ්පාදනාගාරවලින් 20%ක් පමණ දැනටමත් තාවකාලිකව වසා දමා ඇත්තේ අමුද්රව්ය හිඟය සහ පිරිවැය ඉහළ යාම හේතුවෙනි. ප්ලාස්ටික් බෝතල්වලට අමතරව වීදුරු බෝතල් නිෂ්පාදනයට අවශ්ය ස්වභාවික වායු සැපයුම සීමා වීම නිසා වීදුරු බෝතල්වල මිල ද 20% කින් පමණ ඉහළ ගොස් තිබේ.
මේ හේතුවෙන් හෙයිනෙකන් (Heineken) සහ කාල්ස්බර්ග් (Carlsberg) වැනි ප්රධාන පෙළේ බීර නිෂ්පාදන සමාගම් ද සිය නිෂ්පාදන මිල 12% – 15% අතර අගයකින් ඉහළ නැංවීමට රජයෙන් අවසර ඉල්ලා ඇත. යුද්ධය තවදුරටත් පැවතුණහොත් ඖෂධ සහ රූපලාවන්ය නිෂ්පාදන ඇතුළු ඇසුරුම්කරණ ක්ෂේත්රයේ සියලුම භාණ්ඩවල මිල ඉහළ යා හැකි බව ආර්ථික විශේෂඥයෝ පෙන්වා දෙති. ඉරාන යුද්ධයේ බලපෑම දැන් ක්රමයෙන් දකුණු ආසියානු කලාපයේ සාමාන්ය ජනතාවගේ එදිනෙදා පරිභෝජනයට ද දැඩි ලෙස බලපාමින් පවතී.
