ප්රකට හොලිවුඩ් නිළි බ්ලේක් ලයිව්ලි විසින් සිය “It Ends with Us” චිත්රපටයේ සම-නළු ජස්ටින් බැල්ඩෝනිට එරෙහිව ගොනුකර තිබූ ලිංගික හිංසනය සහ අපහාස කිරීම පිළිබඳ චෝදනා රැසක් නිව්යෝර්ක් ෆෙඩරල් අධිකරණය විසින් ඉවත දමා තිබේ. විනිසුරු ලුවිස් ලිමන් (Lewis Liman) විසින් ලයිව්ලි ඉදිරිපත් කළ චෝදනා 13න් 10ක්ම ප්රතික්ෂේප කර ඇත්තේ ඒවා නීතිමය පදනමක් නොමැති බව පවසමිනි. කෙසේ වෙතත්, ගිවිසුම් කඩකිරීම සහ පළිගැනීමේ චේතනාවෙන් කටයුතු කිරීම සම්බන්ධ චෝදනා තුනක් විභාග කිරීමට අධිකරණය තීරණය කර ඇත.
මෙම නීතිමය අර්බුදය ආරම්භ වූයේ 2024 වසරේදී වන අතර, එහිදී ලයිව්ලි චෝදනා කළේ චිත්රපටයේ රූගත කිරීම් අතරතුර බැල්ඩෝනි ඇයට හිංසා කළ බවත් ඇයගේ කීර්ති නාමය විනාශ කිරීමට සමාජ මාධ්ය හරහා සංවිධානාත්මක මෙහෙයුමක් දියත් කළ බවත්ය. විනිසුරුවරයා පවසා ඇත්තේ ඇතැම් චෝදනා සිදුවී ඇතැයි කියන ප්රදේශය (කැලිෆෝනියාව සහ නිව් ජර්සි අතර ගැටලුවක්) සහ ලයිව්ලි ස්වාධීන කොන්ත්රාත්කාරියක ලෙස කටයුතු කිරීම යන කරුණු මත මෙම චෝදනා පවත්වාගෙන යා නොහැකි බවයි.
මේ අතර, මීට පෙර ජස්ටින් බැල්ඩෝනි විසින් බ්ලේක් ලයිව්ලිට සහ ඇයගේ ස්වාමිපුරුෂයා වන සුපිරි නළු රයන් රෙනෝල්ඩ්ස්ට (Ryan Reynolds) එරෙහිව ඉදිරිපත් කළ ඩොලර් මිලියන 400 ක ප්රති-නඩුව ද අධිකරණය විසින් මීට පෙර ඉවත දමන ලදී. එළඹෙන මැයි 18 වැනිදා මෙම නඩුවේ සිවිල් විභාගය ආරම්භ වීමට නියමිත අතර එහිදී සාක්ෂි දීමට බ්ලේක් ලයිව්ලි සූදානමින් සිටින බව ඇයගේ නීතිඥ කණ්ඩායම පවසයි. ටේලර් ස්විෆ්ට් (Taylor Swift) සහ ලයිව්ලි අතර හුවමාරු වූ කෙටි පණිවුඩ ද මෙම නඩුවේ සාක්ෂි ලෙස ඉදිරිපත් කර තිබීම විශේෂත්වයකි.
