හංගේරියාවේ තීරණාත්මක මහ මැතිවරණය අප්රේල් 12 වැනිදා පැවැත්වීමට නියමිතව තිබියදී, ඇමරිකානු උප ජනාධිපති ජේ.ඩී. වැන්ස් (JD Vance) ලබන අඟහරුවාදා සහ බදාදා දිනවල එරට සංචාරයක නිරත වන බව ධවල මන්දිරය නිවේදනය කරයි. වසර 16ක් පුරා බලයේ රැඳී සිටින අග්රාමාත්ය වික්ටර් ඕර්බන් (Viktor Orbán) සිය දේශපාලන ජීවිතයේ දරුණුතම අභියෝගයට මුහුණ දී සිටින මොහොතක මෙම සංචාරය සිදුවීම විශේෂත්වයකි.
පීටර් මාග්යාර් (Péter Magyar) ගේ නායකත්වයෙන් යුත් ‘ටිසා’ (Tisza) පක්ෂය මේ වන විට මත විමසුම්වලින් ඕර්බන්ගේ ‘ෆිඩෙස්’ (Fidesz) පක්ෂයට වඩා ඉදිරියෙන් සිටින බව වාර්තා වේ. මෙම පසුබිම තුළ උප ජනාධිපතිවරයා අග්රාමාත්ය ඕර්බන් සමඟ සාකච්ඡා පවත්වනු ඇති අතර, ඇමරිකාව සහ හංගේරියාව අතර පවතින “ප්රබල හවුල්කාරිත්වය” පිළිබඳව විශේෂ ප්රකාශයක් කිරීමට ද නියමිතය.
ට්රම්ප් පරිපාලනය සැමවිටම ඕර්බන්ගේ ගතානුගතික සහ සංක්රමණ විරෝධී ප්රතිපත්තිවලට ප්රසිද්ධියේ සහාය දක්වා තිබේ. පසුගිය පෙබරවාරි මාසයේදී ජනාධිපති ඩොනල්ඩ් ට්රම්ප් ද ඕර්බන් වෙත සිය සහාය පළ කළ අතර, මීට පෙර ජපානයේ සැනේ ටකායිචි සහ ආර්ජන්ටිනාවේ ජේවියර් මිලෙයි වැනි සිය දේශපාලන මිතුරන්ට සහාය පළ කර ඔවුන් ජයග්රහණය කරවීමට ට්රම්ප් කටයුතු කර තිබීම ද මෙහිදී කැපී පෙනේ.
