ඉතා කුඩා බිළිඳියක ලිංගික දූෂණයට ලක් කිරීමේ සහ ඒ සඳහා අනුබල දීමේ අතිශය පිළිකුල් සහගත චෝදනාවලට වරදකරුවන් වූ පුද්ගලයින් දෙදෙනෙකුට බ්රිතාන්යයේ කේම්බ්රිජ් ක්රවුන් අධිකරණය (Cambridge Crown Court) විසින් ජීවිතාන්තය දක්වා සිරදඬුවම් නියම කර තිබේ. කේම්බ්රිජ්ෂයර් හි පදිංචි 27 හැවිරිදි ඊතන් ටවර්ස් (Ethan Towers) නැමැත්තා පසුගිය වසරේදී මෙම බිළිඳිය පස් වතාවක් දූෂණය කර ඇති අතර, එසෙක්ස් හි පදිංචි 28 හැවිරිදි ජෝන් වොට්සන් (John Watson) නැමැත්තා එම අපරාධය සිදු කිරීමට ඔහු උනන්දු කර ඇති බව විමර්ශනවලදී හෙළි විය.
නඩු විභාගයේදී විනිසුරු මාර්ක් බිෂොප් මහතා ප්රකාශ කළේ මෙම බිළිඳියගේ වයස අතිශයින්ම කුඩා බවත්, විත්තිකරුවන් දෙදෙනාම සමාජයට දැඩි අවදානමක් පවතින “භයානක පුද්ගලයන්” බවත්ය. ටවර්ස් විසින් අදාළ බිළිඳියගේ අසභ්ය දර්ශන වොට්සන් වෙත යවා ඇති අතර, වොට්සන් ද වයස අවුරුදු 16ට අඩු වෙනත් දරුවෙකු සමඟ සමාජ මාධ්ය ඔස්සේ අසභ්ය සන්නිවේදනයන් සිදු කර ඇති බව අධිකරණයේදී අනාවරණය විය. මීට පෙර ද ළමා අසභ්ය දර්ශන සම්බන්ධයෙන් වරදකරු වී සිටි වොට්සන්ට ලිංගික හානි වැළැක්වීමේ නියෝගයක් (Sexual Harm Prevention Order) පවා අධිකරණය මඟින් නිකුත් කර තිබූ පසුබිමක ඔහු මෙම අපරාධයට සම්බන්ධ වී ඇත.
අධිකරණය හමුවේ අදහස් දැක්වූ බිළිඳියගේ මව පවසා ඇත්තේ මෙම සිදුවීමෙන් පසු තමා දැඩි බියකින් සහ හුදකලාවකින් පසුවන බවයි. විත්තිකරුවන් දෙදෙනාම තමන්ට එල්ල වූ චෝදනාවලට වරද පිළිගත් අතර, ඒ අනුව ඊතන් ටවර්ස්ට අවම වශයෙන් වසර 12ක සහ මාස පහක සිරදඬුවමක් ද, ජෝන් වොට්සන්ට වසර 13ක සහ මාස හතරක සිරදඬුවමක් ද සහිතව ජීවිතාන්තය දක්වා සිරදඬුවම් නියම විය. මීට අමතරව ඔවුන්ට වින්දිතයන්ගෙන් ඈත්ව සිටීමේ තහනම් නියෝග (Restraining Orders) ද නිකුත් කර ඇති අතර, කේම්බ්රිජ්ෂයර් පොලිසිය සඳහන් කළේ මෙම සිද්ධිය සම්බන්ධයෙන් ළමා සුරැකුම් බලධාරීන් ද දැනුවත් කර ඇති බවයි.
