මෙරට වෙළෙඳපොළේ දැනට පවතින සම්බා සහ කීරි සම්බා සහල් හිඟයට කඩිනම් පිළියමක් ලෙස විකල්ප සහල් වර්ග ආනයනය කිරීම සඳහා වන විශේෂ ගැසට් නිවේදනය ජනාධිපති අනුර කුමාර දිසානායක මහතා විසින් නිකුත් කර තිබෙනවා. පසුගියදා පැවැති කැබිනට් තීරණ දැනුම්දීමේ මාධ්ය හමුවේදී කැබිනට් ප්රකාශක අමාත්ය වෛද්ය නලින්ද ජයතිස්ස මහතා සඳහන් කළ පරිදි, සම්බා සහ කීරි සම්බා සහල් හිඟයට විසඳුමක් ලෙස ‘පොන්නි සම්බා’ සහ ‘කීරි හෝ පාල් පොන්නි’ සහල් ඇතුළුව ‘GR 11’ ලෙස හඳුන්වනු ලබන සහල් මෙට්රික්ටොන් 1,040 ක උපරිම ප්රමාණයක් ආනයනය කිරීමට කැබිනට් මණ්ඩලයේ අනුමැතිය හිමිව තිබෙනවා.
මෙම තීරණයට අනුව ඕනෑම සහල් ආනයනකරුවෙකුට පසුගිය අප්රේල් පළමුවැනිදා සිට අප්රේල් 30 වැනිදා දක්වා වූ කාලසීමාව තුළ මෙම සහල් මෙරටට ආනයනය කිරීමට අවස්ථාව ලැබෙනවා. එලෙස ආනයනය කරනු ලබන සහල් තොග එළඹෙන මැයි මස 31 වනදා හෝ ඊට පෙර ශ්රී ලංකා රේගුවෙන් නිෂ්කාශනය කරගත යුතු බවටද කොන්දේසි පනවා තිබෙනවා. එසේම වෙළෙඳපොළට සහල් කඩිනමින් සැපයීමේ අරමුණින් මෙම සහල් වර්ග ගෙන්වන ආනයනකරුවන් ආනයන පාලන බලපත්ර ලබා ගැනීමේ අවශ්යතාවයෙන් නිදහස් කිරීමටද ජනාධිපතිවරයා නිකුත් කළ ගැසට් නිවේදනය මඟින් පියවර ගෙන තිබෙනවා.
කෘෂිකර්ම දෙපාර්තමේන්තුව, හෙක්ටර් කොබ්බෑකඩුව ගොවි කටයුතු පර්යේෂණ සහ පුහුණු ආයතනය සහ ජාතික පසු අස්වනු කළමනාකරණ ආයතනය ලබා දුන් නවතම වාර්තා අනුව 2025/26 මහ කන්නයේ සම්බා සහ කීරි සම්බා මුළු නිෂ්පාදනය මෙරට පාරිභෝගික අවශ්යතාව සපුරාලීමට ප්රමාණවත් නොවන බව පාරිභෝගික කටයුතු පිළිබඳ අධිකාරිය පෙන්වා දී තිබෙනවා. මේ හේතුවෙන් 2026 මැයි මාසයේ සිට මෙරට තුළ උග්ර සහල් හිඟයක් ඇතිවීමේ අවදානමක් පවතින බැවින් ස්ථාවර මිලක් යටතේ පාරිභෝගිකයන්ට සහල් ලබා දීමට සහ ඉල්ලුම සපුරාලීමට මෙලෙස සම්බා සහල්වලට සමාන විදේශීය සහල් වර්ග ආනයනය කිරීමට ආහාර ප්රතිපත්ති සහ සුරක්ෂිතතා කමිටුව නිර්දේශ කර තිබෙනවා.
