ඇමරිකාවේ ටෙක්සාස් ප්රාන්තයේ සිට වොෂින්ටනය දක්වා ප්රාන්ත 10ක් පසු කරමින් දින 110ක් පුරා සාමය වෙනුවෙන් පාගමනේ යෙදුණු ගෞරවනීය භික්ෂූන් වහන්සේලාගේ සහභාගිත්වයෙන් මෙරටදී ‘Walk for Peace Program in Sri Lanka’ නමින් විශේෂ සාම පාගමනක් පැවැත්වීමට කටයුතු සූදානම් කර තිබෙනවා. මෙම සාම පාගමනට රාජ්ය අනුග්රහය ලබා දීම පිළිබඳ විශේෂ සාකච්ඡාවක් ජනාධිපති ලේකම් ආචාර්ය නන්දික සනත් කුමානායක මහතාගේ සහභාගිත්වයෙන් සහ ආචාර්ය පූජ්ය මේල්පිටියේ විමලකිත්ති හිමියන්ගේ ප්රධානත්වයෙන් ජනාධිපති කාර්යාලයේදී පවත්වා ඇති බවයි ජනාධිපති මාධ්ය අංශය වාර්තා කරන්නේ.
ඇමරිකානු සාම පාගමන සඳහා නායකත්වය දුන් පූජ්ය පඤ්ඤාකර ස්වාමීන් වහන්සේ ප්රමුඛ භික්ෂූන් වහන්සේලා දොළොස් නමක් මෙම මස 21 වන දා මෙරටට වැඩම කිරීමට නියමිත අතර, අප්රේල් 22 වන දා සිට අප්රේල් 28 වන දා දක්වා දින හතක් පුරා මෙම සාම පාගමන පැවැත්වෙනවා. අප්රේල් 21 වන දින ඓතිහාසික අනුරාධපුර ජය ශ්රී මහා බෝ සමිඳුන් අභියසදී ආශිර්වාද ලබා ගැනීමෙන් අනතුරුව පාගමනේ කටයුතු ආරම්භ කෙරෙන අතර අටමස්ථානාධිපති හිමියන් ප්රමුඛ මහා සංඝරත්නයේ ආශිර්වාදයෙන් ලබා ගන්නා ශ්රී මහා බෝධි අංකුරයක්ද මෙම සාම පාගමන සමඟ වැඩම කරවීමට නියමිතයි. ඓතිහාසික රුවන්වැලි මහා සෑය අභියස පැවැත්වෙන විශේෂ ආගමික වතාවත්වලින් අනතුරුව අනුරාධපුර දිස්ත්රික්කයේ ජනතාව වෙත සාමයේ පණිවිඩය ලබා දීමද මෙහිදී සිදු කෙරෙනවා.
අප්රේල් 22 වන දා උදෑසන සංඝගත දක්ෂිණාවෙන් අනතුරුව දඹුල්ල පූජා නගරයෙන් ආරම්භ වන මෙම සාම පාගමන නාඋල, මාතලේ, මහනුවර, කඩුගන්නාව, කෑගල්ල, තෝලංගමුව, කජුගම, යක්කල, මහර සහ කැලණිය හරහා ගමන් කර අප්රේල් 28 වන දින කොළඹ නිදහස් චතුරස්රය වෙත ළඟා වීමට නියමිතයි. සාම පාගමනේ නිමාව සනිටුහන් කරමින් එහි වැඩම කරවන ලද ශ්රී මහා බෝධීන් වහන්සේගේ අංකුරය ජනාධිපති අනුර කුමාර දිසානායක මහතා අතින් රාජ්යතාන්ත්රික මට්ටමින් ඇමරිකාවේ සිට වැඩම කළ මහා සංඝරත්නය වෙත භාර දීමටද නියමිතව තිබෙනවා.
ක්ලීන් ශ්රී ලංකා ලේකම් කාර්යාලයේද දායකත්වය යටතේ පැවැත්වෙන මෙම සාම පාගමනට එක් වන භික්ෂූන් වහන්සේලාගේ දානය සහ ගිලන්පස සූදානම් කිරීම, සනීපාරක්ෂක කටයුතු මෙන්ම ආරක්ෂාව සැපයීම ඇතුළු සංවිධාන කටයුතු පිළිබඳව අදාළ අමාත්යාංශවල ලේකම්වරුන්, පොලිස්පතිවරයා සහ ත්රිවිධ හමුදාවේ ජ්යෙෂ්ඨ නිලධාරීන්ගේ සහභාගිත්වයෙන් පැවැති මෙම සාකච්ඡාවේදී දීර්ඝ ලෙස අවධානය යොමු කර තිබෙනවා.
