ඕස්ට්රේලියාවේ නිව් සවුත් වේල්ස් (NSW) ප්රාන්තයේ පෝර්ට් මැකවරි ප්රදේශයේ පසුගිය වසරේ අවසානයේ සිදුවූ දරුණු පහරදීමක් සම්බන්ධයෙන් පරීක්ෂණ පවත්වන රහස් පොලිස් නිලධාරීන්, සිද්ධියට සම්බන්ධ යැයි සැක කරන මෝටර් රථයක සීසීටීවී (CCTV) දර්ශන අද (02) මාධ්ය වෙත මුදා හැර තිබේ.
2025 නොවැම්බර් 12 වන බදාදා රාත්රී 10.20 ට පමණ බුලර් සහ හොලිංවර්ත් වීදි මංසන්ධියේදී මෙම පහරදීම සිදුවී ඇත. පාරේ ගමන් කරමින් සිටි 45 හැවිරිදි පුද්ගලයෙකුට ගමන් කරමින් තිබූ මෝටර් රථයක සිටි පිරිසක් විවිධ ද්රව්යවලින් පහර දී ඇති අතර පසුව එම රථයෙන් බැස ආ පුද්ගලයෙකු විසින් ඔහුට දරුණු ලෙස පහර දී තිබේ.
පහරදීමෙන් හිසට සහ මුහුණට බරපතල තුවාල ලැබූ පුද්ගලයා පෝර්ට් මැකවරි රෝහලට සහ පසුව වැඩිදුර ප්රතිකාර සඳහා සිඩ්නි ඇස් රෝහල (Sydney Eye Hospital) වෙත ඇතුළත් කර ඇති අතර මේ වන විට ඔහු ප්රතිකාර ලබා පිටව ගොස් ඇත. මිඩ් නෝර්ත් කෝස්ට් (Mid North Coast) පොලිස් දිස්ත්රික්කයේ නිලධාරීන් විසින් මේ පිළිබඳව දීර්ඝ විමර්ශනයක් ආරම්භ කර තිබේ.
පොලිසිය මේ වන විට සොයමින් සිටින්නේ ක්වීන්ස්ලන්ත (Queensland) ප්රාන්ත ලියාපදිංචි අංකයක් සහිත රිදී පැහැති Kia Rio (Hatchback) වර්ගයේ මෝටර් රථයක් සහ එහි සිටි පුද්ගලයින් පිළිබඳවයි. මෙම රථය හෝ එහි සිටි අය හඳුනාගත හැකි ඕනෑම අයෙකු සිටී නම් වහාම ක්රයිම් ස්ටොපර්ස් (Crime Stoppers) ආයතනයට දැනුම් දෙන ලෙස පොලිසිය මහජනයාගෙන් ඉල්ලා සිටී.
