මීගමුව ප්රදේශය කේන්ද්ර කරගනිමින් වසර ගණනාවක් තිස්සේ මිනීමැරුම්, කප්පම් ගැනීම් සහ දරුණු ගණයේ අපරාධ මෙහෙයවූ ප්රබල පාතාල කල්ලි නායකයෙකු වන මොහොමඩ් ජලීල් මොහොමඩ් ෆෙරෝස් නොහොත් “ෆෙරෝස්” නමැත්තා 2011 වර්ෂයේදී නාඳුනන සන්නද්ධ කණ්ඩායමක් විසින් පැහැරගෙන ගොස් තිබේ. එක් දිනෙක පරණ හලාවත පාරේ පිහිටි සිය නිවසට පැමිණෙමින් සිටියදී සැඟව සිටි සන්නද්ධ පිරිසක් විසින් මොහොමඩ් ෆෙරෝස්ව “සුදු වෑන්” රථයකින් පැහැරගෙන ගොස් ඇති බව වාර්තා වේ.
මොහුට එරෙහිව එල්ල වී ඇති චෝදනා අතර සිය බිරිඳට සිරින්ජරයක් මඟින් සයිනයිඩ් ශරීරගත කර ඝාතනය කිරීම ඇතුළු මිනීමැරුම් දහයකට ආසන්න සංඛ්යාවක් පවතින බව පොලිස් ආරංචි මාර්ග පවසයි. මිනුවන්ගොඩ අසිත බන්ධනාගාරය තුළදී වෙඩි තබා ඝාතනය කිරීම, බන්ධනාගාර නිලධාරියෙකු වූ හරේන්ද්ර මහතා ඝාතනය කිරීම සහ මීගමුවේ ප්රකට ව්යාපාරිකයන් ඝාතනය කිරීම පිටුපස ද ෆෙරෝස් සිටින බව හෙළි වී තිබේ. කලක් පොලිස් වෙඩි පහරින් මියගිය “ඕල්කට්” නමැති පාතාල සාමාජිකයාගේ සමීපතමයෙකු වූ මොහු, හදිසි අනතුරකින් තම දකුණු පාදය අහිමි වීමෙන් පසු කෘත්රිම පාදයක් ආධාරයෙන් මෙම අපරාධ මෙහෙයවා ඇත.
ෆෙරෝස්ගේ අපරාධ අධිරාජ්යය රැඳී පැවතියේ එකල සිටි ප්රබල දේශපාලනඥයන්ගේ රැකවරණය මත බව පැවැසේ. රජයේ ප්රබල නියෝජ්ය අමාත්යවරයෙකු සහ කොළඹ ප්රදේශයේ ජනප්රිය තරුණ මන්ත්රීවරයෙකුගේ මැදිහත්වීම මත ඔහු කිහිප වතාවක්ම පොලිස් අත්අඩංගුවෙන් නිදහස් වූ බව ද වාර්තා වේ. මීගමුවේ ධනවත් ව්යාපාරිකයන්ගෙන් මාසිකව ලක්ෂ ගණනින් කප්පම් ලබාගත් මොහුට තිබූ බිය නිසා කිසිවෙකු ඔහුට එරෙහිව පැමිණිලි කිරීමට ඉදිරිපත් නොවූ අතර, අවසානයේ මෙම අභිරහස් පැහැරගැනීමත් සමඟ ඔහුගේ පාතාල ගමන නිමාවට පත් විය.
