ඇමරිකානු ජනාධිපති ඩොනල්ඩ් ට්රම්ප් විසින් ඊයේ (02) අත්සන් කරන ලද නව විධායක නියෝගයකට අනුව, ඉදිරි මාස කිහිපය තුළ රජය සමඟ එකඟතාවලට එළඹීමට අපොහොසත් වන සමාගම්වල පේටන්ට් බලපත්ර සහිත ඖෂධ සඳහා 100% දක්වා බදු පැනවීමට තීරණය කර තිබේ. ඖෂධ මිල අඩු කිරීම සහ නිෂ්පාදන කටයුතු ඇමරිකාව තුළම ස්ථාපිත කිරීම මෙම දැඩි පියවරෙහි ප්රධාන අරමුණ වී ඇත.
මෙම නව නීතිය යටතේ, ඇමරිකානු රජය සමඟ “වඩාත්ම වාසිදායක ජාතිය” (Most Favoured Nation) මිල ගිවිසුම්වලට එළඹෙන සහ ඖෂධ නිෂ්පාදනාගාර ඇමරිකාව තුළ ඉදිකිරීමට කටයුතු කරන සමාගම් සඳහා 0% ක බදු සහනයක් හිමිවේ. කෙසේ වෙතත්, එවැනි මිල ගිවිසුමකට එළඹ නැති නමුත් ඇමරිකාව තුළ නිෂ්පාදනාගාර ඉදිකරන සමාගම් සඳහා 20% ක බද්ධක් පැනවෙන අතර, එය වසර හතරක් ඇතුළත 100% දක්වා ඉහළ නැංවීමට නියමිතය.
පාලනාධිකාරියේ ජ්යෙෂ්ඨ නිලධාරියෙකු ප්රකාශ කළේ, විශාල සමාගම්වලට මෙම එකඟතාවලට එළඹීම සඳහා දින 120 ක කාලයක් ද, අනෙකුත් සමාගම්වලට දින 180 ක කාලයක් ද ලබා දෙන බවයි. දැනටමත් ප්රධාන ඖෂධ නිෂ්පාදන සමාගම් 17 ක් සමඟ මිල ගිවිසුම් සම්බන්ධයෙන් සාකච්ඡා පවත්වා ඇති අතර, ඉන් සමාගම් 13 ක් දැනටමත් ඊට අත්සන් තබා ඇත. යුරෝපා සංගමය, ජපානය, කොරියාව සහ ස්විට්සර්ලන්තය වැනි රටවල සමාගම් සඳහා පවතින වෙළඳ ගිවිසුම් යටතේ යම් සහනයක් හිමිවනු ඇතැයි ද වාර්තා වේ.
