රුසියාවේ ප්රධාන රාජ්ය තෙල් සහ ගෑස් සමාගම් වන ‘රොස්නෙෆ්ට්’ (Rosneft) සහ ‘ගෑස්ප්රොම්’ (Gazprom) විසින් යුක්රේන දරුවන් 2,000 කට අධික පිරිසක් රුසියාවට රැගෙන යාමේ ක්රියාවලියට මූල්යමය සහ ප්රවාහන පහසුකම් සපයා ඇති බවට යේල් විශ්වවිද්යාලයේ නවතම පර්යේෂණ වාර්තාවක් මගින් චෝදනා කර තිබේ. මෙම දරුවන් රඳවා සිටින යුධකාලීන කඳවුරු සඳහා අදාළ සමාගම්වල වෘත්තීය සමිති හරහා ප්රතිපාදන ලබා දී ඇති බව එම වාර්තාවේ සඳහන් වේ.
යේල් මහජන සෞඛ්ය පාසලේ මානුෂීය පර්යේෂණාගාරය (Yale HRL) පවසන්නේ, රුසියාව විසින් ක්රමානුකූලව සිදුකරනු ලබන යුක්රේන දරුවන් පිටුවහල් කිරීමේ සහ ඔවුන්ගේ මතවාද වෙනස් කිරීමේ (Indoctrination) වැඩපිළිවෙළට මෙම සමාගම් සෘජුවම දායක වී ඇති බවට ස්ථිර සාක්ෂි මෙලෙස ප්රථම වරට ප්රසිද්ධ වී ඇති බවයි. කෙසේ වෙතත්, රොස්නෙෆ්ට් සමාගම මෙම චෝදනා ප්රතික්ෂේප කර ඇති අතර තම ස්වාධීන වෘත්තීය සමිතිවල ක්රියාකාරකම්වලට තමන් සම්බන්ධ නොවන බව ප්රකාශ කර ඇත.
මෙම අනාවරණයත් සමඟ අමෙරිකානු කොංග්රස් මණ්ඩල සාමාජිකයන් පිරිසක් රුසියානු තෙල් සහ ගෑස් අංශය සඳහා පනවා තිබූ සම්බාධක යළි දැඩි කරන ලෙස එරට රජයෙන් ඉල්ලා තිබේ. යුක්රේන යුද්ධය පවතින පසුබිමක දරුවන් මෙලෙස බලහත්කාරයෙන් පිටුවහල් කිරීම ජාත්යන්තර නීතිය උල්ලංඝනය කිරීමක් ලෙස මානව හිමිකම් සංවිධාන පෙන්වා දෙයි.
