අඩු ආදායම්ලාභී රටවලට මැලේරියාව සහ එච්.අයි.වී (HIV) වැනි රෝග සඳහා අවශ්ය වෛද්ය උපකරණ සහ ඖෂධ ලබා දෙන ගෝලීය සැපයුම් ජාලය වෙනස් කිරීමට ඇමරිකා එක්සත් ජනපදය ගෙන ඇති තීරණයත් සමඟ, එම ජීවිතාරක්ෂක සේවාවන් බිඳ වැටීමේ දැඩි අවදානමක් මතුව ඇති බව රොයිටර් පුවත් සේවය වාර්තා කරයි. 2016 වසරේ සිට ක්රියාත්මක වූ මෙම සැපයුම් යාන්ත්රණය ලබන මැයි 30 වනදා සිට අවසන් කිරීමට ඇමරිකාව සූදානම් වන අතර, ඒ වෙනුවට ක්රියාත්මක කරන නිසි විකල්ප සැලසුමක් මෙතෙක් ප්රකාශයට පත් කර නොමැත.
ඇමරිකානු ජාත්යන්තර සංවර්ධන නියෝජිතායතනය (USAID) හරහා ක්රියාත්මක වූ මෙම වැඩපිළිවෙළ මගින් මේ දක්වා අප්රිකානු සහ ආසියානු කලාපයේ රටවල් 90 කට ඇමරිකානු ඩොලර් බිලියන 5 කට අධික වටිනාකමකින් යුත් වෛද්ය ආධාර ලබා දී තිබේ. ‘Chemonics’ නම් පුද්ගලික කොන්ත්රාත් සමාගමක් හරහා මෙහෙයවූ මෙම සැපයුම් දාමය හදිසියේ වෙනස් කිරීම නිසා එච්.අයි.වී සහ මැලේරියා මර්දන කටයුතුවල නිරත සෞඛ්ය සේවකයන් සහ රෝගීන් දැඩි අනාරක්ෂිත භාවයකට පත්ව ඇති බව වාර්තා වේ.
විශේෂයෙන්ම අප්රිකානු රටවල් සමඟ ඇති කර ගැනීමට නියමිත නව සෞඛ්ය ගිවිසුම් සම්බන්ධයෙන් ද විවිධ බාධාවන් මතුව ඇති පසුබිමක, මෙම හදිසි සංක්රාන්ති කාලසීමාව සෞඛ්ය ක්ෂේත්රයට දැඩි බලපෑමක් එල්ල කරනු ඇතැයි ඇමරිකානු රාජ්ය දෙපාර්තමේන්තුවේ අභ්යන්තර ආරංචි මාර්ග අනතුරු අඟවයි. ලෝක සෞඛ්ය ක්ෂේත්රයේ ප්රවීණයන් පවසන්නේ නිසි සැලසුමකින් තොරව මෙවැනි පියවරක් ගැනීමෙන් මිලියන සංඛ්යාත ජනතාවකගේ ජීවිත අවදානමට ලක්විය හැකි බවයි.
