මධ්යම පෙරදිග පවතින යුදමය වාතාවරණය හමුවේ ගෝලීය තෙල් සැපයුම දිනකට බැරල් මිලියන 12 කින් පමණ සීමා වී ඇති පසුබිමක, යුරෝපා සංගමය (EU) සිය බලශක්ති සුරක්ෂිතතාව පිළිබඳව දැඩි අවධානයක් යොමු කර තිබේ. ජාත්යන්තර බලශක්ති ඒජන්සිය (IEA) විසින් නිදහස් කරන ලද තෙල් බැරල් මිලියන 400 න් බැරල් මිලියන 92 ක් යුරෝපා රටවල් 20 ක දායකත්වයෙන් ලබා දී ඇති අතර, විශ්ලේෂකයන් පවසන පරිදි එම ප්රමාණය මාස පහක පමණ කාලයක් සඳහා ප්රමාණවත් වනු ඇත.
යුරෝපා සංගමය දිනකට තෙල් බැරල් මිලියන 10.5 ක් පමණ පරිභෝජනය කරන අතර, එය ගෝලීය ඉල්ලුමෙන් 10% කට ආසන්න ප්රමාණයකි. ජර්මනිය (බැරල් මිලියන 2.3), ප්රංශය (මිලියන 1.6) සහ ඉතාලිය (මිලියන 1.3) යුරෝපයේ වැඩිම තෙල් පාරිභෝගිකයන් ලෙස හඳුනාගෙන ඇත. බලශක්ති කොමසාරිස් ඩෑන් ජොර්ගන්සන් (Dan Jørgensen) අනතුරු අඟවන්නේ, මධ්යම පෙරදිග මත යැපෙන ඩීසල් සහ ගුවන් යානා ඉන්ධන (Jet fuel) සැපයුම ඉදිරියේදී දැඩි හිඟයකට ලක්විය හැකි බවයි.
පවතින උග්ර බලශක්ති අර්බුදය හමුවේ ඉන්ධන බිල්පත් ඉහළ යාම පාලනය කිරීමටත්, හැකි තාක් වාහන භාවිතය සීමා කිරීමටත් යුරෝපා බලධාරීන් සිය වැසියන්ගෙන් ඉල්ලා සිටී. දීර්ඝ කාලීන ගැටුම්කාරී තත්ත්වයක් හමුවේ යුරෝපා රටවල් සියල්ල ඒකාබද්ධව කටයුතු කිරීමේ අවශ්යතාව ද මෙහිදී අවධාරණය කර ඇත.
