ජේසුස් ක්රිස්තුස් වහන්සේ මරණය පරාජය කරමින් උත්ථානය වීම සිහිපත් කරන උතුම් පාස්කු මංගල්යය නිමිත්තෙන් අග්රාමාත්ය ආචාර්ය හරිනි අමරසූරිය මහත්මිය සිය ශුභාශිංසන එක් කර තිබේ. කිසිදු අඳුරු රාත්රියක් ස්ථිර නොවන බවත්, සෑම අභියෝගයකටම පසු බලාපොරොත්තුවේ අරුණෝදය උදාවන බවත් පෙන්වා දෙන අග්රාමාත්යවරිය, අඳුර පරදා ආලෝකයත්, බිය පරදා විශ්වාසයත් ජයගත හැකි බවට වූ පාස්කු පණිවිඩය වර්තමාන සමාජයට අතිශය වැදගත් බව අවධාරණය කරයි. අත් නොහරින අධිෂ්ඨානයෙන් යුතුව ජීවිතය අලුතින් ආරම්භ කිරීමට මෙම ආගමික උත්සවය දිරිගැන්වීමක් වන බව ඇය සඳහන් කළාය.
ලෝකවාසී කිතුනු බැතිමතුන් මහත් හරසරින් පාස්කු දිනය සමරන මෙම මොහොතේ, මැදපෙරදිග කලාපයේ පවතින අවාසනාවන්ත යුදමය තත්ත්වය පිළිබඳව ද අග්රාමාත්යවරිය සිය කණගාටුව පළ කර සිටියි. වෛරය සහ ගැටුම් වෙනුවට සාකච්ඡාව සහ අවබෝධය රජයන, යුද බිය පහව ගිය සාමකාමී ලෝකයක් උදාවේවා යන්න මෙවර පාස්කු දිනයේ ප්රධාන ප්රාර්ථනාව විය යුතු බව ඇය සිය පණිවිඩය මගින් පෙන්වා දෙයි. ගෝලීය අර්බුද හමුවේ පීඩාවට පත් ජනතාව කෙරෙහි මානුෂීය සහකම්පනය දැක්වීම උතුම් ආගමික ගුණාංගයක් බව ද එහි සඳහන් වේ.
අග්රාමාත්යවරිය වැඩිදුරටත් ඉල්ලා සිටින්නේ ක්රිස්තුස් වහන්සේ වදාළ ප්රේමයේ සහ සාමයේ පණිවිඩය පෙරදැරි කරගෙන සියලු භේදයන් දුරු කර සහෝදරත්වයෙන් යුත් මානව පවුලක් ලෙස ශ්රී ලංකාව ගොඩනැඟීමට එක්වන ලෙසයි. හදවත් ප්රේමයෙන්, ඉවසීමෙන් සහ සමාව දීමේ ගුණයෙන් පෝෂණය කර ගැනීම තුළින් යහපත් සමාජයක් නිර්මාණය කළ හැකි බව ඇය විශ්වාසය පළ කරයි. ශ්රී ලාංකේය සියලු කිතුනු ජනතාවට සාමය සහ දේව ආශිර්වාදය පිරි සුබ පාස්කු මංගල්යයක් වේවායි ප්රාර්ථනා කරමින් අග්රාමාත්යවරිය සිය පණිවිඩය අවසන් කර තිබේ.
