2019 වසරේ සිදුවූ පාස්කු ඉරිදා බෝම්බ ප්රහාරයේ වින්දිතයන්ට යුක්තිය ඉටු කිරීම රජයක මූලික වගකීමක් වුවද, ප්රහාරයෙන් වසර 7ක් ගතවී ඇතත් අතීත සහ වර්තමාන රජයන් දෙකම වගවීම ඉටු කිරීමට අපොහොසත් වී ඇතැයි විපක්ෂ නායක සජිත් ප්රේමදාස මහතා පවසනවා.
අද (අප්රේල් 05) දිනට යෙදී ඇති පාස්කු ඉරිදා දිනය නිමිත්තෙන් විශේෂ පණිවුඩයක් නිකුත් කරමින් ඔහු කියා සිටියේ, පාස්කු මංගල්යය මඟින් බලාපොරොත්තුව, අලුත් වීම සහ නව ආරම්භයක් නියෝජනය කළද, 2019 අප්රේල් 21 වනදා මෙරට දේවස්ථාන සහ සංචාරක හෝටල් ඉලක්ක කර ගනිමින් එල්ල වූ මරාගෙන මැරෙන බෝම්බ ප්රහාරයන්හි වේදනාකාරී මතකයන් තවමත් ජනතාව තුළ නොමැකී පවතින බවයි.
එම බිහිසුණු ප්රහාරයෙන් මියගිය, තුවාල ලැබූ සහ විපතට පත් වූ සියලු දෙනාට මෙතෙක් සාධාරණය ඉටු නොවීම ජාතියක් වශයෙන් ලැබූ බරපතල අසාර්ථකත්වයක් බව ඔහු පෙන්වා දෙනවා. සත්යය හෙළිදරව් කිරීම සහ යුක්තිය ඉටු කිරීම මඟහැරිය නොහැකි බවත්, නීතියේ ආධිපත්යය, වගවීම සහ විනිවිදභාවය රැක ගැනීම මෙම වගකීම ඉටු කිරීමේදී අත්යවශ්ය සාධක බවත් ඔහු අවධාරණය කළා. මෙවැනි ඛේදවාචකයන් නැවත ඇති නොවීම සහතික කිරීම සඳහා සියලු ජාතීන්, ආගම් සහ ප්රජාවන් එකමුතු කරමින් විශ්වාසය හා සාමය මත පදනම් වූ සමාජයක් ගොඩනැගීම අත්යවශ්ය බව පැවසූ විපක්ෂ නායකවරයා, වින්දිතයන්ට ගෞරව කිරීමට සහ සත්යය, යුක්තිය, සාමය මෙන්ම සමගිය වෙනුවෙන් සාමූහික කැපවීම අලුත් කිරීමට මෙම පාස්කු සැමරුම මොහොතක් කරගන්නා ලෙස ජනතාවගෙන් ඉල්ලා සිටිනවා.
