දිනකින් රටක් සංවර්ධනය කිරීමට හෝ සමාජය වෙනස් කිරීමට නොහැකි බැවින්, වත්මන් රජය පිහිටුවීමේ පරමාර්ථ සාක්ෂාත් කරගන්නා තෙක් රජය ආරක්ෂා කරගත යුතු බව ජනතා විමුක්ති පෙරමුණේ ප්රධාන ලේකම් තිල්වින් සිල්වා මහතා ප්රකාශ කළේය.
වවුනියාවේ පැවැති “අප්රේල් විරු සැමරුම” අමතමින් ඔහු කියා සිටියේ, පැවති පැරණි ක්රමය වෙනස් කර නව ක්රමයක් ඇති කිරීම සඳහා රට පුරා සිටින ජනතාවගේ සහයෝගයෙන් ජාතික ජන බලවේග රජය පිහිටුවූ බවයි. වසර 76 ක් පැරණි ක්රමය, පැරණි නීති, ආයතනික රාමුව සහ යාන්ත්රණයන් වෙනස් කිරීම ලෙහෙසි පහසු කාර්යයක් නොවන බවද ඔහු පෙන්වා දුන්නේය.
ලෝකයේ සිංගප්පූරුව සහ චීනය වැනි සමහර රටවල් වෙනස් වීමට වසර 10 සිට 25 දක්වා කාලයක් ගත වූ බව සඳහන් කළ ඔහු, මුළු මහත් සමාජයම වෙනස් කිරීමට වසර ගණනාවක් ගත වන බව අවධාරණය කළේය. එම නිසා රජය පිහිටුවීමේ අරමුණු ඉටු කර ගන්නා තෙක් රජය ආරක්ෂා කළ යුතු බවත්, මෙම කටයුතු වසර පහක් ඇතුළත නිම කළ නොහැකි බවත් ඔහු වැඩිදුරටත් කියා සිටියේය.
