ඉරාන දේශසීමාව තුළ අතිශය භයානක මෙහෙයුමක් දියත් කරමින් අතුරුදන්ව සිටි දෙවන අමෙරිකානු ගුවන් නියමුවා ද මුදාගැනීමට සමත් වීමත් සමඟ ජනාධිපති ඩොනල්ඩ් ට්රම්ප් සිය ජයග්රහණය ප්රකාශ කර තිබේ. අමෙරිකානු ගුවන් බලය ලොව අංක එක බව මෙමඟින් යළිත් තහවුරු වූ බව ඔහු පවසන නමුත් ආරක්ෂක විශ්ලේෂකයන් පෙන්වා දෙන්නේ ඉරානය සතු මිසයිල පද්ධති තවමත් අමෙරිකානු යානාවලට දැඩි තර්ජනයක්ව පවතින බවයි. සති කිහිපයක දැවැන්ත ප්රහාරවලින් පසු ඉරානයේ ගුවන් ආරක්ෂක පද්ධති විනාශ කළ බව ට්රම්ප් පැවසුව ද පසුගිය දින කිහිපය තුළ අමෙරිකානු යානා දෙකක් බිම හෙලීමට ඉරානය සමත් විය.
මෙම සාර්ථක මුදාගැනීමේ මෙහෙයුමෙන් දිරිමත් වී සිටින ට්රම්ප් පාලනය ඉරානයේ තෙල් මධ්යස්ථාන අත්පත් කරගැනීමේ මෙහෙයුමක් දියත් කිරීමට ඇති ඉඩකඩ වැඩි වී තිබේ. එහෙත් ඉරානය සතු උරහිස මත තබා විදිය හැකි ‘මෑන්පෑඩ්ස්’ (Manpads) මිසයිල පද්ධති නිසා ඕනෑම ගොඩබිම් මෙහෙයුමක් අතිශය අවදානම් සහගත වනු ඇතැයි වොෂින්ටන් ආරංචි මාර්ග පවසයි. මේ අතර හෝමුස් සමුද්ර සන්ධිය විවෘත නොකළහොත් ඉරානයේ බලාගාර සහ පාලම් විනාශ කරන බවට ට්රම්ප් යළිත් අනතුරු අඟවා ඇති අතර ඉරානය පවසන්නේ ඔවුන්ගේ වෙළඳාමට සිදුවූ හානි සඳහා වන්දි ලැබෙන තෙක් සමුද්ර සන්ධිය විවෘත නොකරන බවයි.
නියමුවන් දෙදෙනාම බේරාගැනීම නිසා ඉරානයට ලැබීමට තිබූ ප්රබල ප්රචාරක ජයග්රහණයක් අහිමි වී ගිය ද ඉදිරි දින කිහිපය තුළ ඉරාන යටිතල පහසුකම් ඉලක්ක කර අමෙරිකාව එල්ල කරන ප්රහාර නිසා යුද්ධය තවදුරටත් දරුණු වීමේ අවදානමක් පවතී. ට්රම්ප්ගේ ආධාරකරුවන් මෙම මුදාගැනීම සැමරුව ද තවත් දීර්ඝ යුද්ධයකට අමෙරිකානු ජනතාව තුළ පවතින්නේ අඩු කැමැත්තකි. අඟහරුවාදා ලබා දී ඇති කාලසීමාවෙන් පසු මැදපෙරදිග කලාපයේ තත්ත්වය කුමන අතට හැරේවිද යන්න පිළිබඳව මුළු ලෝකයම දැඩි අවධානයෙන් පසුවෙයි.
