ගණේමුල්ලේ සංජීව ඝාතන සිද්ධියේ ප්රධාන සැකකාරියක ලෙස රඳවාගෙන ප්රශ්න කරන ඉෂාරා සෙව්වන්දිගේ උපන් දිනය වෙනුවෙන් කොළඹ අපරාධ කොට්ඨාසයට ලැබුණු කේක් ගෙඩියක විෂ රසායනයක් හෝ මත්ද්රව්යයක් අඩංගු දැයි පරීක්ෂා කිරීම සඳහා එය රජයේ රස පරීක්ෂක වෙත යොමු කරන ලෙස කොළඹ අතිරේක මහේස්ත්රාත් කසුන් කාංචන දසනායක මහතා අද (06) නියෝග කළේය. පසුගිය 29 වන දිනට යෙදී තිබූ ඇයගේ උපන් දිනය නිමිත්තෙන් මෙම කේක් ගෙඩිය ලැබී තිබූ අතර, ඒ පිළිබඳව සැකයක් මතු වීම නිසා පූර්ණ විමර්ශනයක් ආරම්භ කළ බව කොළඹ මධ්යම අපරාධ විමර්ශන කොට්ඨාසය අධිකරණයට දැනුම් දුන්නේය.
මෙම ඝාතන සිද්ධියේ 15 වන සැකකාරිය ලෙස නම් කර සිටින ඉෂාරා සෙව්වන්දි, ප්රථම දින 90ක රැඳවුම් කාලයෙන් පසු මේ වන විට දෙවන දින 90ක කාලයක් සඳහා රඳවා තබාගෙන ප්රශ්න කරනු ලබයි. සැකකාරිය සම්බන්ධ විමර්ශන කඩිනම් කර ඇයව අධිකරණයට ඉදිරිපත් කරන ලෙස කොළඹ ප්රධාන මහේස්ත්රාත්වරයා මීට පෙර නියෝග කර තිබුණි. ඒ අනුව ඉදිරිපත් වූ කරුණු සලකා බැලූ අතිරේක මහේස්ත්රාත්වරයා, අදාළ කේක් ගෙඩිය රස පරීක්ෂක වාර්තාවක් සඳහා යොමු කිරීමට අවසර ලබා දුන් අතර විමර්ශන ප්රගතිය කඩිනමින් අධිකරණයට ඉදිරිපත් කරන ලෙස පොලිසියට නියෝග කළේය.
