පසුගිය 2020 වසරේ කොවිඩ් වසංගත සමයේ ඉන්දියාවේ තමිල්නාඩු ප්රාන්තයේදී සිදුවූ අතිශය අමානුෂික පිය-පුතු ඝාතනයකට සම්බන්ධ පොලිස් නිලධාරීන් නව දෙනෙකුට එරෙහිව එරට අධිකරණය විසින් මරණ දඬුවම නියම කර තිබේ. කොවිඩ් ඇඳිරි නීති උල්ලංඝනය කරමින් තම ජංගම දුරකථන වෙළඳසැල විවෘතව තැබූ බවට චෝදනා කරමින් අත්අඩංගුවට ගත් 58 හැවිරිදි පී. ජෙයරාජ් සහ ඔහුගේ 38 හැවිරිදි පුත් බෙනික්ස් යන දෙදෙනා බන්ධනාගාරයේදී මියගිය අතර, එය පොලිස් ම්ලේච්ඡත්වයට එරෙහිව දැවැන්ත මහජන විරෝධයක් රට පුරා මතු කිරීමට හේතු විය.
මෙම නඩු තීන්දුව ප්රකාශයට පත් කළ විනිසුරුවරයා සඳහන් කළේ අදාළ පොලිස් නිලධාරීන් තම බලය අයුතු ලෙස භාවිත කරමින්, මෙම පිය පුතු දෙදෙනා නිරුවත් කර එකිනෙකා ඉදිරිපිටදීම අනුකම්පා විරහිතව පහර දී ඇති බවයි. මෙය පැහැදිලිවම මරා දැමීමේ චේතනාවෙන් සිදුකළ ක්රියාවක් බවත්, උගත් පුද්ගලයන් වන මෙම නිලධාරීන් නිරායුධ සිවිල් වැසියන්ට එල්ල කළ ප්රහාරය කිසිසේත් සමාව දිය නොහැකි බවත් අධිකරණය අවධාරණය කළේය. මෙම සිද්ධියට අදාළව නිලධාරීන් දස දෙනෙකු අත්අඩංගුවට ගෙන තිබූ අතර, ඉන් එක් අයෙකු කොවිඩ් ආසාදනය වීමෙන් මීට පෙර මියගොස් තිබුණි. වරදකරුවන් වූ ඉතිරි නිලධාරීන් නව දෙනාට අභියාචනා ඉදිරිපත් කිරීමේ අවස්ථාව තවදුරටත් පවතී.
