ලෝක බලශක්ති සැපයුමේ තීරණාත්මක මංසන්ධියක් වන හෝමුස් සමුද්ර සන්ධිය (Strait of Hormuz) යළි විවෘත කිරීම සම්බන්ධයෙන් තමන් ලබා දී ඇති කාලසීමාවට පෙර එකඟතාවයකට නොපැමිණියහොත්, ඉරානය “එක් රැයකින්” විනාශ කරන බවට ඇමරිකානු ජනාධිපති ඩොනල්ඩ් ට්රම්ප් දැඩි අනතුරු ඇඟවීමක් කර තිබේ. වොෂින්ටන් වේලාවෙන් අඟහරුවාදා රාත්රී 8:00 වන විට බලශක්ති ප්රවාහයට බාධාවක් නොවන අන්දමේ “පිළිගත හැකි” එකඟතාවයකට ඉරානය පැමිණිය යුතු බවට ට්රම්ප් අවසාන නිවේදනයක් නිකුත් කර ඇත. ඉරානයේ ඇතැම් නායකයන් යහපත් චේතනාවෙන් සාකච්ඡා කරන බව තමන් විශ්වාස කරන නමුත්, එහි අවසාන ප්රතිඵලය පිළිබඳව තවමත් නිශ්චිත විශ්වාසයක් නොමැති බව ජනාධිපතිවරයා ධවල මන්දිරයේ පැවති මාධ්ය හමුවකදී ප්රකාශ කළේය.
කෙසේ වෙතත්, තාවකාලික සටන් විරාමයක් සඳහා වන යෝජනා ප්රතික්ෂේප කර ඇති ඉරානය, පවතින ගැටුම් ස්ථිර ලෙස අවසන් කරන ලෙසත් සම්බාධක ඉවත් කරන ලෙසත් ඉල්ලා සිටියි. පසුගියදා ඉරානය විසින් වෙඩි තබා බිම හෙළන ලද ඇමරිකානු F-15 ප්රහාරක යානයක ගුවන් නියමුවන් දෙදෙනා බේරාගැනීමේ මෙහෙයුම අගය කළ ට්රම්ප්, නියමිත කාලසීමාව වන විට සමුද්ර සන්ධිය විවෘත නොකළහොත් ඉරානයේ බලශක්ති සහ ප්රවාහන යටිතල ව්යුහයන් වෙත ප්රහාර එල්ල කරන බව නැවතත් අවධාරණය කළේය. “මුළු රටම එක රැයකින් විනාශ කළ හැකියි – සමහර විට ඒ රාත්රිය හෙට රාත්රිය විය හැකියි” යනුවෙන් ඔහු වැඩිදුරටත් සඳහන් කළේ පවතින උණුසුම්කාරී තත්ත්වය තවදුරටත් තීව්ර කරමිනි.
