වර්තමාන ඉරාන-ඇමෙරිකානු යුදමය තත්ත්වය හමුවේ සටන් විරාමයකට (Ceasefire) එළඹීම පමණක් කලාපීය ප්රශ්නවලට විසඳුමක් නොවන බව එක්සත් අරාබි එමීර් රාජ්යය (UAE) අවධාරණය කරයි. යුරෝ නිව්ස් (Euronews) පුවත් සේවය සමඟ අදහස් දක්වමින් එක්සත් අරාබි එමීර් රාජ්යයේ ජනාධිපතිවරයාගේ රාජ්යතාන්ත්රික උපදේශක අන්වර් ගර්ගාෂ් (Anwar Gargash) ප්රකාශ කළේ, වර්තමාන ඉරාන පාලනය කෙරෙහි තමන්ට කිසිදු විශ්වාසයක් නොමැති බවයි.
ඉරානය විසින් පසුගිය මාසය පුරා එමීර් රාජ්යය ඇතුළු අසල්වැසි රටවල් වෙත එල්ල කරන ලද මිසයිල සහ ඩ්රෝන ප්රහාර හේතුවෙන් කලාපීය ස්ථාවරත්වය දැඩි ලෙස බිඳ වැටී තිබේ. එබැවින් සටන් විරාමයකින් ඔබ්බට ගිය, ඉරානයේ න්යෂ්ටික වැඩසටහන, මිසයිල තාක්ෂණය සහ හෝර්මුස් සමුද්ර සන්ධියේ නාවික ආරක්ෂාව තහවුරු කරන පුළුල් ආරක්ෂක එකඟතාවක් (Broad security architecture) අවශ්ය බව ඔහු පෙන්වා දෙයි.
වර්තමාන ඉරාන පාලනය රටේ ජනතාව වෙනුවෙන් නොව තම පාලන තන්ත්රය රැක ගැනීමට පමණක් සටන් කරන බව පවසන ගර්ගාෂ් මහතා, අසල්වැසි රටවලට එරෙහිව ඉරානය දක්වන සතුරු ආකල්ප නතර විය යුතු බව අවධාරණය කළේය. එමෙන්ම මෙම අර්බුදය හමුවේ එක්සත් අරාබි එමීර් රාජ්යය සිය ප්රධාන ආරක්ෂක සහකරු වන ඇමෙරිකා එක්සත් ජනපදය සමඟ පවතින සබඳතාව තවදුරටත් ශක්තිමත් කරන බවත්, ප්රංශය වැනි රටවල් ලබා දෙන සහයෝගය අගය කරන බවත් ඔහු වැඩිදුරටත් කියා සිටියේය. මෙම යුදමය වාතාවරණය හේතුවෙන් ගල්ෆ් කලාපය තුළ ඇමෙරිකානු සහ ඊශ්රායල බලපෑම තවදුරටත් වර්ධනය වනු ඇති බව ද ඔහු අනාවැකි පළ කළේය.
