ඉරාන යුද්ධය හේතුවෙන් මැදපෙරදිග ගුවන් කලාපය දැඩි අනතුරකට ලක්ව ඇති පසුබිමක, ගැටුම් පවතින ප්රදේශ හරහා පියාසර කිරීම ප්රතික්ෂේප කිරීමට ගුවන් නියමුවන්ට “අවසාන සහ සාකච්ඡා කළ නොහැකි” (Final and non-negotiable) බලය ලබා දිය යුතු බව ජාත්යන්තර ගුවන් නියමුවන්ගේ සංගම් සම්මේලනය (IFALPA) අවධාරණය කරයි. මොන්ට්රියල් නුවර පදනම් කරගත් මෙම ගෝලීය සංගමය සඳහන් කරන්නේ, වාණිජමය බලපෑම් හෝ මූල්යමය වාසි මත පදනම් නොවී තම මගීන්ගේ සහ කාර්ය මණ්ඩලයේ ආරක්ෂාව තහවුරු කිරීමට ගුවන් නියමුවන්ට ස්වාධීන තීරණ ගැනීමට අවස්ථාව තිබිය යුතු බවයි. සති හයක් පුරා පවතින ඉරාන යුද්ධය හේතුවෙන් එල්ල වන ඩ්රෝන සහ මිසයිල ප්රහාර හමුවේ ගුවන් නියමුවන් දැඩි මානසික සහ ආවේගාත්මක පීඩනයකට ලක්ව ඇති බව ද එම සංගමය පෙන්වා දෙයි.
මෙම තත්ත්වය හමුවේ ගෝලීය ගුවන් සේවාවල ක්රියාකාරීත්වය පිළිබඳව වාර්තා වන තොරතුරු කිහිපයක් මෙසේය. Flightradar24 දත්තවලට අනුව, ඩුබායි පදනම් කරගත් Emirates ගුවන් සේවය දැනට සිය සාමාන්ය ධාරිතාවයෙන් 69% ක් පමණ ක්රියාත්මක කරන අතර Qatar Airways සමාගම 26% ක ධාරිතාවකින් යුතුව සිය ගුවන් ගමන් මෙහෙයවනු ලබයි. මෙයින් අදහස් වන්නේ දිනපතා ගුවන් ගමන් සිය ගණනක් ඉරාන මිසයිල සහ ඩ්රෝන ප්රහාර එල්ල වන අවදානම් සහිත ගුවන් කලාප හරහා ගමන් කරන බවයි. එක්සත් ජාතීන්ගේ ගුවන් සේවා නියෝජිතායතනය ද ඉරානය විසින් සිදු කරනු ලබන නීති විරෝධී ගුවන් කලාප උල්ලංඝනය කිරීම් දැඩි ලෙස හෙළා දැක ඇති අතර, ආරක්ෂිත පියවරක් ලෙස ගුවන් මාර්ග වෙනස් කිරීමට හෝ ගමන් වාර අවලංගු කිරීමට ගුවන් නියමුවන්ට පවතින අයිතිය පිළිගත යුතු බව IFALPA සංගමය සිය ප්රතිපත්ති වාර්තාව මඟින් යෝජනා කර තිබේ.
