Artemis II මෙහෙයුමේ නියැලී සිටින ගගනගාමීන් විසින් චන්ද්රයාගේ වඩා දුරින් පිහිටි ප්රදේශයේ (Far side of the Moon) සිට ලබාගත් ප්රථම ඡායාරූපය ධවල මන්දිරය විසින් නිල වශයෙන් ප්රසිද්ධියට පත් කර තිබේ. පෘථිවියට කිසිදා දර්ශනය නොවන සඳෙහි අනෙක් පස සිට ලබාගත් මෙම ඓතිහාසික ඡායාරූපයෙහි, පෘථිවිය සඳෙහි ක්ෂිතිජයෙන් ඔබ්බට බැස යන අයුරු ඔරායන් (Orion) යානයේ සිට කැමරාවට හසු කරගෙන ඇති ආකාරය සුවිශේෂී වේ. මීට පෙර මිනිසෙකු ගමන් නොකළ තරම් දුරක් අභ්යවකාශයේ සංචාරය කළ Artemis II මෙහෙයුමේ නියමුවන් මේ වන විට සිය මෙහෙයුම සාර්ථකව නිමා කර නැවත පෘථිවිය බලා පැමිණෙමින් සිටිති.
නාසා (NASA) ආයතනය සඳහන් කරන පරිදි, පසුගිය සඳුදා සවස ඔරායන් යානය පෘථිවියේ සිට සැතපුම් 252,756ක් (කිලෝමීටර් 406,771ක්) දුරින් පියාසර කරමින් නව ලෝක වාර්තාවක් පිහිටුවීමට ද සමත් විය. මෙම මෙහෙයුමේදී ගගනගාමීන් සඳට කොතරම් සමීප වූයේද යත්, ඔවුන්ට සඳ දිස්ව ඇත්තේ අතේ දුරින් තබාගත් පැසිපන්දුවක ප්රමාණයට බව නාසා ආයතනය වැඩිදුරටත් අනාවරණය කළේය. සඳ වටා ගමන් කිරීමේදී පෘථිවියට කිසිදා නොපෙනෙන සඳෙහි එම අඳුරු පැත්ත සියැසින් දැකගත් ප්රථම මිනිසුන් කණ්ඩායම ලෙස ද මෙම ගගනගාමීන් පිරිස ඉතිහාසයට එක් වී තිබේ.
මෙම සාර්ථකත්වය ඉදිරි Artemis III මෙහෙයුම හරහා නැවත වරක් මිනිසෙකු හඳ මත පය තැබීමේ අරමුණ කරා යන ගමනේ තීරණාත්මක සන්ධිස්ථානයක් ලෙස සැලකේ. අතිනවීන තාක්ෂණය භාවිත කරමින් ලබාගත් මෙම ඡායාරූප මඟින් චන්ද්රයාගේ භූ විද්යාත්මක ලක්ෂණ පිළිබඳව නව තොරතුරු රැසක් අනාවරණය කර ගැනීමට විද්යාඥයන් අපේක්ෂා කරයි.
