ශ්රී ලංකාවට බලපාන විවිධ ආපදා තත්ත්වයන් පිළිබඳව ජනතාව පූර්ව දැනුවත් කිරීම සඳහා නවීන තාක්ෂණික යෙදවුමක් (App) හඳුන්වා දීමට ආපදා කළමනාකරණ මධ්යස්ථානය අද (අප්රේල් 07) පියවර ගත්තේය. ලෝක බැංකු ආධාර මත ක්රියාත්මක වන දේශගුණික බලපෑම් අවම කිරීමේ ව්යාපෘතිය යටතේ නිර්මාණය කර ඇති මෙම යෙදවුම, පරිගණක මෙන්ම ජංගම දුරකතන ඔස්සේ ද පහසුවෙන් භාවිත කළ හැකි පරිදි සකස් කර තිබේ.
මෙම යෙදවුම සුවිශේෂී වන්නේ කාලගුණ විද්යා දෙපාර්තමේන්තුව, ජාතික ගොඩනැගිලි පර්යේෂණ සංවිධානය, වාරිමාර්ග දෙපාර්තමේන්තුව සහ මහවැලි අධිකාරිය ඇතුළු ආපදා කළමනාකරණයට අදාළ ආයතන 50කට අධික සංඛ්යාවක දත්ත එකම වේදිකාවකට (Platform) ගොනු කර තිබීම හේතුවෙනි. එහිදී කෘත්රිම බුද්ධිය (AI) යොදා ගනිමින් එම දත්ත විශ්ලේෂණය කර වඩාත් නිවැරදි පූර්ව අනතුරු ඇඟවීම් නිකුත් කෙරෙන අතර, එමඟින් ග්රාමීය මට්ටමේ ජනතාවට කඩිනමින් තොරතුරු ලබා දීමටත් හදිසි මෙහෙයුම් වඩාත් කාර්යක්ෂමව සම්බන්ධීකරණය කිරීමටත් හැකියාව ලැබේ.
යෙදවුම හඳුන්වා දීමේ අවස්ථාවට ආපදා කළමනාකරණ මධ්යස්ථානයේ අධ්යක්ෂ ජනරාල්, විශ්රාමික මේජර් ජෙනරාල් සම්පත් කොටුවේගොඩ මහතා ඇතුළු නිලධාරීන් පිරිසක් එක්ව සිටියහ. මෙම නව තාක්ෂණික මෙවලම මඟින් ස්වාභාවික ආපදාවලින් සිදුවන ජීවිත හා දේපළ හානි අවම කර ගැනීමට මෙන්ම ආපදා කළමනාකරණ ක්රියාවලිය නව මානයකට ඔසවා තැබීමටත් රජය අපේක්ෂා කරයි.
