අද (අප්රේල් 08) ජාත්යන්තර මාධ්ය වාර්තා කරන්නේ, ඉරානයේ පාලම් සහ විදුලි බලාගාර වැනි සිවිල් යටිතල පහසුකම් ඉලක්ක කර ප්රහාර එල්ල කිරීම සඳහා සිය හමුදා කඳවුරු භාවිත කිරීමට අමෙරිකාවට ඇති අවසරය බ්රිතාන්යය විසින් සීමා කර ඇති බවයි. ප්රකට මාධ්යවේදී මාරියෝ නව්ෆල් (Mario Nawfal) පෙන්වා දෙන්නේ, බ්රිතාන්ය රජය සිය කඳවුරු භාවිතය ‘ආරක්ෂක මෙහෙයුම්’ (Defensive operations) සඳහා පමණක් සීමා කර ඇති බවත්, “මෙය අපේ යුද්ධයක් නොවේ” යන ස්ථාවරයේ ඔවුන් දැඩිව සිටින බවත්ය.
මෙම තීරණයත් සමඟ ඉතාලිය ද සිය ස්ථාවරය ප්රකාශ කර ඇති අතර, ෆිනෑන්ෂල් ටයිම්ස් (Financial Times) වාර්තාවලට අනුව ඉතාලි රජය ද සිය කඳවුරු හරහා ඉරානයට එරෙහිව ප්රහාරක මෙහෙයුම් දියත් කිරීමට පනවා ඇති සීමාවන් තවදුරටත් තහවුරු කර තිබේ. යුරෝපීය මිත්ර රටවල් මෙලෙස පසුබැසීමට ප්රධාන හේතුව වී ඇත්තේ, ජනාධිපති ට්රම්ප් විසින් ඉරානයේ සිවිල් මධ්යස්ථාන ඉලක්ක කර ප්රහාර එල්ල කරන බවට කරන ප්රකාශයන් හරහා යුද්ධය තවදුරටත් ව්යාප්ත වීමේ අවදානමයි.
මේ අතර, ඉරානය විසින් එල්ල කළ බැලිස්ටික් මිසයිලයක් ඊශ්රායලයේ දකුණු දිග නෙගෙව් (Negev) කාන්තාර ප්රදේශයට පතිත වී ඇති බව වාර්තා වේ. ඊශ්රායල මාධ්ය පවසන්නේ එය ජනාවාස නොමැති විවෘත ප්රදේශයකට පතිත වී ඇති බැවින් ජීවිත හානි හෝ බරපතළ හානි සිදුව නොමැති බවයි. කෙසේ වෙතත්, ටෙල් අවිව් නුවර පවතින යුද විරෝධී උද්ඝෝෂණ සහ අමෙරිකානු තානාපති කාර්යාලය ඉදිරිපිට සිදුවන ගැටුම් හමුවේ, ඊශ්රායල සමාජය තුළ ද යුද්ධයට එරෙහිව “සත්යය කරළියට එමින් පවතින” බවට සමාජ මාධ්ය හරහා මතයන් ප්රකාශ වෙමින් පවතී.
තොරතුරු උපුටා ගැනීම: mario nawfal(x) සහ financial times ඇසුරින්
