පසුගිය 2025 වසර තුළ ශ්රී ලංකාවෙන් මිලියන 15කට ආසන්න දේශීය අනිෂ්ට මෘදුකාංග (Local Malware) සිදුවීම් වාර්තා වී ඇති බව කැස්පර්ස්කි (Kaspersky) ආයතනය අනාවරණය කරයි. මෙහි ඇති විශේෂත්වය වන්නේ මෙරට පරිශීලකයින්ගෙන් තුනෙන් එකකට වඩා වැඩි පිරිසක් මෙම තර්ජනවලට ගොදුරු වී ඇත්තේ අන්තර්ජාලය හරහා නොව, USB දත්ත ගබඩා (Pen drives) සහ බාහිර දත්ත ගබඩා මාධ්ය වැනි නොබැඳි (Offline) ක්රමවේද හරහා වීමයි.
කැස්පර්ස්කි ආරක්ෂණ ජාලයේ දත්තවලට අනුව, 2025 ජනවාරි සිට දෙසැම්බර් දක්වා කාලය තුළ මෙරටින් අනිෂ්ට මෘදුකාංග සිදුවීම් 14,960,244ක් වාර්තා වී තිබේ. මෙරට පරිශීලකයින්ගෙන් 37.4%ක්ම USB ඩ්රයිව්, සීඩී (CD) සහ ඩීවීඩී (DVD) වැනි මාධ්ය හරහා පැතිරෙන වෛරසවලට ඉලක්ක වී ඇති අතර, දේශීය තර්ජනවලට නිරාවරණය වීමේ ගෝලීය දර්ශකයට අනුව ශ්රී ලංකාව 48 වන ස්ථානයේ පසුවේ. බොහෝ ආසාදන “Worms” සහ “File Viruses” කාණ්ඩවලට අයත් වන අතර, පොදුවේ උපාංග හුවමාරු වන සේවා ස්ථාන සහ අධ්යාපන ආයතන තුළ මේවා සීඝ්රයෙන් පැතිරෙන බව නිරීක්ෂණය වී ඇත.
අන්තර්ජාලය හරහා එල්ල වන ප්රහාර පිළිබඳව වැඩි අවධානයක් යොමු වී තිබුණද, නොබැඳි ක්රමවේද හරහා සිදුවන ආසාදන ශ්රී ලංකාවේ තවමත් ප්රබල අවදානමක් ලෙස පවතින බව කැස්පර්ස්කි ආයතනයේ ආසියානු නැගී එන රටවල් පිළිබඳ විකුණුම් ප්රධානී සෑම් යාන් මහතා පෙන්වා දෙයි. ගෝලීය වශයෙන් දිනකට අනිෂ්ට ගොනු ලක්ෂ 5ක් පමණ හඳුනා ගන්නා අතර, මුරපද සොරකම් කරන මෘදුකාංගවල (Password-stealing malware) 59%ක වර්ධනයක් දක්නට ලැබෙන බැවින්, නන්නාඳුනන USB උපාංග භාවිතයෙන් වැළකී සිටින ලෙසත් මෘදුකාංග යාවත්කාලීනව තබා ගන්නා ලෙසත් පරිශීලකයින්ගෙන් ඉල්ලා සිටියි.
