අමෙරිකාව සහ ඉරානය අතර පාකිස්ථානයේ ඉස්ලාමාබාද් නුවරදී පැවැත්වීමට නියමිතව තිබූ තීරණාත්මක සාම සාකච්ඡා සඳහා ඉරානය අද (අප්රේල් 08) දැඩි කොන්දේසියක් ඉදිරිපත් කර තිබේ. වෝල් ස්ට්රීට් ජර්නල් (WSJ) පුවත්පත වාර්තා කරන පරිදි, ඉරානය කලාපීය මැදිහත්කරුවන්ට දන්වා ඇත්තේ ඊශ්රායලය විසින් ලෙබනනයට එල්ල කරන ප්රහාර වහාම නතර කළහොත් පමණක් තමන් අමෙරිකානු නියෝජිතයින් සමඟ සාකච්ඡා මේසයට පැමිණෙන බවයි. මීට වසර දෙකකට පෙර පැවති තත්ත්වයට වඩා වෙනස්ව, මෙවර ඉරානය සිය මිත්ර හෙස්බොල්ලා සංවිධානය තනි නොකරන බවත්, තමන් සතු යුදමය සහ උපායමාර්ගික ශක්තිය හමුවේ කිසිසේත්ම පසුබෑමකට ලක් නොවන බවත් මෙමගින් පැහැදිලිව පෙනෙන්නට තිබේ.
සටන් විරාම ගිවිසුම ප්රකාශයට පත් කළ ද, ඊශ්රායලය විසින් ලෙබනනයේ ඉලක්ක 100කට අධික සංඛ්යාවකට ප්රහාර එල්ල කිරීමත් සමඟ ඉරානය මෙම තීරණයට එළඹ ඇත. ජනාධිපති ට්රම්ප් විසින් “ලෙබනනය ගිවිසුමට ඇතුළත් නැතැයි” කළ ප්රකාශයට පිළිතුරු වශයෙන් ඉරානය පෙන්වා දෙන්නේ ලෙබනනය නොමැතිව කලාපීය සාමයක් ගැන කතා කළ නොහැකි බවයි. හෝමුස් සමුද්ර සන්ධිය යළිත් වසා දැමීම හරහා තමන්ට පවතින උපායමාර්ගික වාසිය උපයෝගී කර ගනිමින්, අමෙරිකාවට සහ ඊශ්රායලයට දැඩි පීඩනයක් එල්ල කිරීමට ඉරානය දැන් සමත්ව සිටියි.
මෙම කොන්දේසිය හමුවේ පාකිස්ථානය සහ අමෙරිකාව දැඩි අසීරුතාවයකට පත්ව ඇති අතර, ලෙබනනය තුළ ප්රහාර නතර කිරීමට ඊශ්රායලයට බලපෑම් කිරීමට ජනාධිපති ට්රම්ප් පියවර ගනීද යන්න ලෝකයේම අවධානයට ලක්ව තිබේ. ඉරානය සිය ස්ථාවරය ලිහිල් නොකළහොත්, අපේක්ෂිත සති දෙකක සාම කාලය මහා පරිමාණ යුද්ධයක ආරම්භය බවට පත්වීමේ ලකුණු පහළ වී ඇත. විශේෂයෙන්ම මැදපෙරදිග කලාපයේ බල තුලනය සම්බන්ධයෙන් ඉරානය දැන් ඉතා ශක්තිමත් ස්ථාවරයක සිටින බව දේශපාලන විශ්ලේෂකයෝ පෙන්වා දෙති.
