මිලාන්-කෝටිනා ශීත ඍතු ඔලිම්පික් උළෙලට සහභාගී වීමට අවස්ථාව අහිමි වූ සිය රටේ ක්රීඩක ක්රීඩිකාවන් 116 දෙනෙකු සඳහා මූල්ය ප්රසාද දීමනා ලබා දීමට රුසියානු ඔලිම්පික් කමිටුව (ROC) තීරණය කර තිබේ. 2022 වසරේ රුසියාව විසින් යුක්රේනය ආක්රමණය කිරීමෙන් පසු රුසියානු සහ බෙලාරුස් ක්රීඩකයන්ට ජාත්යන්තර ක්රීඩා ඉසව් සඳහා පනවා ඇති තහනම හේතුවෙන් මෙම ක්රීඩකයන්ට අවස්ථාව අහිමි විය. කෙසේ වෙතත්, දැඩි කොන්දේසි යටතේ රුසියානු ක්රීඩකයන් 13 දෙනෙකුට මෙවර ඉතාලියේ පැවැති තරගාවලියට ස්වාධීන ක්රීඩකයන් ලෙස සහභාගී වීමට අවසර ලැබුණි.
රුසියානු ක්රීඩා අමාත්ය සහ ඔලිම්පික් කමිටු සභාපති මිහායිල් ඩෙග්ටයාරෙව් (Mikhail Degtyarev) මහතා ප්රකාශ කළේ, දේශපාලනික තීරණ හේතුවෙන් තරගාවලියට යාමට නොහැකි වූ ක්රීඩකයන්ගේ අයිතිවාසිකම් වෙනුවෙන් පෙනී සිටින බවයි. රුසියානු ජාතික ධජය සහ ජාතික ගීය යටතේ නැවතත් ජාත්යන්තර තරගාවලි සඳහා සහභාගී වීමට අවශ්ය පසුබිම සකස් කරන බව ද ඔහු වැඩිදුරටත් පැවසීය. මෙවර ශීත ඍතු ඔලිම්පික් උළෙලේදී රුසියාව වෙනුවෙන් පදක්කමක් දිනාගත් එකම ක්රීඩකයා වූයේ ස්කී මවුන්ටනියරින් (Ski mountaineering) ඉසව්වෙන් රිදී පදක්කම දිනූ නිකිතා ෆිලිප්පොව් (Nikita Filippov) පමණි.
මේ අතර, මාර්තු මාසයේ පැවැති ශීත ඍතු පැරාලිම්පික් උළෙලේදී රුසියානු ක්රීඩකයන් 6 දෙනෙකුට සහ බෙලාරුස් ක්රීඩකයන් 4 දෙනෙකුට වසර 12 කට පසු පළමු වතාවට තම ජාතික ධජය යටතේ තරග වැදීමට අවස්ථාව හිමි විය. එය ජාත්යන්තර පැරාලිම්පික් කමිටුව විසින් පනවා තිබූ තහනම ඉවත් කිරීමේ ප්රතිඵලයකි. කෙසේ වෙතත්, ඔලිම්පික් කමිටුව තවමත් රුසියානු ක්රීඩකයන්ට යුද්ධයට සහය නොදක්වන බවට වන දැඩි නිර්ණායක මත පමණක් ස්වාධීන ලෙස ක්රීඩා කිරීමට අවසර ලබා දෙයි.
