2018 සිට 2022 දක්වා වූ වසර හතරක කාලය තුළ මෙරට ක්රියාත්මක වූ ක්ෂුද්ර, කුඩා හා මධ්ය පරිමාණ ව්යාපාර ඇතුළු ආර්ථික මධ්යස්ථාන ලක්ෂ දෙකකට අධික ප්රමාණයක් විවිධ හේතූන් මත වසා දමා ඇති බව මුදල් සහ ක්රමසම්පාදන නියෝජ්ය අමාත්ය අනිල් ජයන්ත මහතා අද (09) පාර්ලිමේන්තුවේදී ප්රකාශ කළේය.
අමාත්යවරයා ඉදිරිපත් කළ සංඛ්යාලේඛනවලට අනුව, දැඩි ලෙස බලපෑ ආර්ථික අර්බුදය හේතුවෙන් පමණක් ව්යාපාරික ආයතන එක්ලක්ෂ අටදහසක් (108,000) වැසී ගොස් තිබේ. මීට අමතරව, වෙනත් විවිධ හේතූන් මත තවත් ආයතන එක්ලක්ෂ පනස්පන්දහසක් (155,000) වසා දමා ඇති බව ඔහු පෙන්වා දුන්නේය.
ජනලේඛන හා සංඛ්යාලේඛන දෙපාර්තමේන්තුව විසින් සිදුකරන ලද සමීක්ෂණ දත්ත උපුටා දක්වමින් අමාත්යවරයා සඳහන් කළේ, මෙරට සමස්ත ආයතන සංඛ්යාව මිලියන 1.3ක් පමණ වන බවයි. කෙසේ වෙතත්, මේ වන විට ඉන් සක්රීයව පවතින්නේ දසලක්ෂ තිස්හත්දහසක් (1,037,000) වැනි ප්රමාණයක් පමණක් බවත්, ඉතිරි ආයතන වසා දැමීමට සිදුවීම හරහා රටේ නිෂ්පාදන ක්රියාවලියට සහ රැකියා වෙළඳපොළට විශාල බලපෑමක් එල්ල වී ඇති බවත් අමාත්යවරයා වැඩිදුරටත් අවධාරණය කළේය.
