TikTok හි මව් සමාගම වන ByteDance, සිය කොටස් අලෙවි කිරීමේ ක්රියාවලියක් අතරතුර ඩොලර් බිලියන 600 ඉක්මවන වාර්තාගත වටිනාකමක් (Valuation) ලබා ගැනීමට සමත් වී තිබේ. සමාගමේ නිර්මාතෘවරයෙකු සතු කොටස් අලෙවි කිරීමට යාමේදී ආයෝජකයන්ගෙන් ලැබුණු දැවැන්ත ඉල්ලුම හේතුවෙන් මෙම වටිනාකම ඉහළ ගොස් ඇති බව වාර්තා වේ.
මුලින් සමාගමේ වටිනාකම ඩොලර් බිලියන 550ක් ලෙස තක්සේරු කර තිබුණද, ආයෝජක උනන්දුව මත එය ඩොලර් බිලියන 600 සීමාව පසුකර ගොස් ඇත. අමෙරිකානු වෙළඳපොළ තුළ TikTok මුහුණ දුන් නීතිමය බාධාවන් හමුවේ වුවද, ‘TikTok USDS’ හවුල්කාරිත්වය හරහා ව්යාපාරික කටයුතු පවත්වාගෙන යාමට ලැබීම සහ කෘතිම බුද්ධි (AI) අංශයේ වර්ධනය මෙලෙස වටිනාකම ඉහළ යාමට ප්රධාන හේතු වී තිබේ.
ByteDance සමාගම 2021 වසරේදී ඩොලර් බිලියන 400ක වටිනාකමක පැවති අතර, පසුව එය ඩොලර් බිලියන 300 දක්වා පහත වැටුණි. කෙසේ වෙතත්, 2025 වසරේ සිට සිය ව්යාපාරික ව්යුහය සාර්ථකව ප්රතිසංවිධානය කිරීමත් සමඟ එය යළිත් වේගයෙන් වර්ධනය වෙමින් පවතින බව මින් පැහැදිලි වේ. මෙම ගනුදෙනුව තවමත් අවසන් අදියරේ පවතින අතර, කොටස් මිලදී ගැනීම සඳහා ප්රබල ආයෝජකයන් කිහිපදෙනෙකුම සාකච්ඡා පවත්වමින් සිටියි.
